Ynne ka sngi ka Jaiñtia Hills Truck Owners Association (JHTOA) da pynman ko ya ka yalang paidbah ha Hall ka Dorbar Chnong Phramer, West Jaiñtia Hills hei emlang u President wa kiwa kitkaam ka All Jaiñtia Cement & Clinker Transporters Association (AJCCTA) heiwa da yaklam ya ki kaam wa da sahteiñ yong ka Joint Action Committee (JAC) ki tre Truck.
Hadien ka yalang hawa yaklam wa kiwa pathai khubor, neiliang u Nehemayah Tyngkan uwa man leh u Publicity Secretary ka JHTOA da ong u wa ynne ka yalang da chim ya ka rai wow chimkti noh ya ki kaam wa sahteiñ yong ka JAC weiwa da rai leh wow epor ya ka seiñ ki karkhana pynmih khyndawbilat hapoh 20 tarik uni u bnai wow pynbiang ya ki mat dawa warim nadooh ka bai kit (bhara), i chah kyrriah ya ki Godown yong ki karkhana na Byrnihat cha chiliang chapoh Assam.
Da ong u leh wa ki karkhana da thied Truck ki wei ini da ktah i ya ki paidbah ha iwa boon i liang kamtæ da rai wow ong ya ki karkhana wow khang noh u pynemkaam ki ya ki kari yong ki wei ymtoh de wow thied kari ki, neibhah lada sdang da kawi ka karkhana kiwi leh daw bood ki wei ini daw ktah i ya ki tre jylla kiwa em Truck.
Hawa kylli lada toh wa da pyndam noh ya ka JAC, neiliang u Nehemayah da ong u wa katkam wa man kattæ ka JAC da kut ko (Dissolve) neibhah wa ki ar seiñ da mih ki na ka wei iwa sñiawsuk won wa ki ar seiñ (AJCCTA wa ka MTU) dang krehlang hi ki wa ka JHTOA wei wa ka JHTOA wow yahkhmat noh ko ya i dawa wa sahteiñ waroh.
Heijooh i por da pyntip u wa da rai leh wow thoh noh cha ka DC ka Ri-Bhoi District wa cha u Montri ka chnat Transport wow chna ya ka thaw uiñ ki kari namo ka U-Turn chwa wow poi ka Jorabad Flyover neibhah wa boonsien hap uiñ ki deiwa psiah chapoh Assam wei ini da wanrah i yei chah pyndik ha ki pulit ka Assam.
Neiliang u President ka JHTOA, u Nidamon Chullet da ong u wa dap ki dei sñiawkhia heiwa da khut ya kani ka yalang ynne hajrong ki bynta kiwa boon ha ki snem wa dadep wei sñiawsih wa waroh ki karkhana hapoh R-loom Jaiñtia da kheiñ broo lut ki ya ki bru ha waroh ki bynta neibhah wa wot hadien kattu wa da dep yaklam pynbait wa ka sorkar chirup wa ki seiñ wa kini ki karkhana neiliang ki karkhana won ym mano ki wot ya ka hukum wa pynmih da ka chnat Transport heiwa da pynkrehkaam ya ka bai kit (T. 7 chi kilometer) du chi sngi ar sngi donhi.
Da kdaw u leh wa ha ka yalang wa ka sorkar da chim leh ya ka rai wa ymtoh u kyrriah ya ki kudam (Godown) wa jooh em hapoh jylla tangwa ki karkhana da kyrriah noh ki ya ki cha Assam.
Chooh chooh da ong u wa da boon ki kari yong ki dkhot ka seiñ wa da chah taan ki neibhah wa da thied ya ki da ka ram wei ymye de ki wow su ya ka Kisti wei sa kini ki karkhana da lehbor ki wow thied wot sa ya ki kari yong ki hi iwa da pyndooh khih ya ki kari ki tre jylla heiwa kam ka Star Cement da thied ko 300 tylli ki Truck 16 chaka, ka Topcem da thied ko 150 tylli, ka Dalmia da phah ko 150 tylli. Da pynrap u deiwa kylli iyi u leh ki tre Truck kattu ya ki kari yong ki wa da thied da ka ram.
Da kyntu u leh ya ka sorkar wow leh yeiwa emkaam hajrong ini waroh i chem chitom yong ki.
