Ynnin ka sngi da pynmih ya ka Wyrta heiyatoh wa i chem ki paidbah ka chnong Umtyra, East Jaiñtia Hills ya iwi i metyap ka manbei ha ka 19 tarik uni u bnai na i thaw wa tip kam i Um-im ha u sarokbah NH-06 iwa jngai kamwa 4 Km na Umtyra.
Ya ini i metyap da wan kam pyn ynnin ka sngi da kiwa hayung yong kani ka manbei ya kawa da tip kam ka Grecia Bareh na Dkhiah East, wei da ekti noh ya i metyap yong ka cha ka yung ka sem.
Hawa yaklam wa ki sahep pulit ka District heiyatoh wa ini iwa jia da chem wa pyn ynnin hi, ki pulit da kreh chitom ki nadooh wa da yoh tip ki wa em uwi u bru uwa emlang wa ka Grecia ha i miet ka 18 tarik chwa wow chem ya i metyap yong ka ha i step ka 19 tarik.
Ki pulit ka District mar tip yeini da krehlang ki chirup wa ki pulit ka Byrnihat Police Station wa ki pulit ka Assam heiwa du hapoh 24 kynta da yoh wow kem noh ya u bru wa suba ki wa emkti ha ini i kaam.
Uni u bru toh uwa yah truck wei jooh ya tipmit u wa ka Grecia wei da tip ya oo kam u Hedstar Dohtdong uwa 42 snem i rta na chnong Pyrda, West Khasi Hills.
Chooh chooh heiyatoh wa ini neiliang ka yung yong ka Grecia da ujor ki ha Khliehriat Police Station wei katkam wa chem na ka Post Mortem daw ye chooh ki wow pynngat kyndon pyrchah ya u Hedstar Dohtdong.
Puræ Chooh: Chem ki paidbah ya iwi i metyap ka kynthai ha Umtyra, EJH
