U Montri ka sorkar pyrdi, u Shantanu Thakur da pynbna u wa yaka Citizenship (Amendment) Act kawa tip leh kam ka CAA toh kawa daw pynkreh noh hapoh waroh kawi ka ri ha kini ki 7 sngi iwa mut hapoh kani ka tayaaw.
Yeini da ong u ha ka yalang paidbah wa da pynman ha South 24 Parganas, West Bengal deiwa ong yaka Ram Mandir da yoh u wai wei hapoh chi tayaaw daw pynkrehkaam yaka CAA ha waroh kawi ka ri ym du hapoh West Bengal.
U Thakur toh u MP Lok Sabha ka BJP na Bangaon, West Bengal uwa man kam u Minister of State wa pait yaka Ministry of Ports, Shipping & Waterways.
Kam wow pynkynmoo wa ka sorkar ini wa dep da ong ko wa chwa ka Election MP daw pynbna ko ya ki kyndon (Rules) wow pynkrehkaam yaka CAA kawa da man kam ka aiñ katni hapoh ka ri nadooh u Kmaichonglad (Dec), 2019.
Hapoh kani ka aiñ toh yow pynsmat yow man kam ki tre ri ya kiwa man kam ki Hindu, ki Sikh, ki Buddhist, ki Jain, ki Parsi wa Christan lait noh ki Muslim kiwa yut cha India neidaw wa chah thombor ki hei pyrtuid ka niam kam ha ri Pakistan, Afghanistan wa Bangladesh.
Kini kiwa yaleh yow man kam ki tre ri hap ki du wow khana ha uwon u snem psiah ki cha India wei ym emkaam ki wow pynyoo ya ki kot ki sla kammon lai luti ki yow psiah cha India kat hadooh ka 31-12-2014 wei ymtoh hadien ini tangwa da em i klam chawah chaneiñ wa manda wanrah ya kani ka Rules daw pynkylla wei pynyinsur ya kani ka tarik.
Hachwa wow em kani ka aiñ CAA, da em ka Indian Citizen Act 1955 kawa e laad wow man kam ki tre chnong ya ki khian paaid ki wym toh ki Muslim kiwa wan na Pakistan, Bangladesh wa Afghanistan kiwa em du ha ki 9 tylli ki jylla, kitæ ka Gujarat, Rajasthan, Chhattisgarh, Haryana, Punjab, Madhya Pradesh, Uttar Pradesh, Delhi wa Maharashtra heiwa ka Ministry of Home Affairs da pyntip ko wa ha u snem 2021-22 nadooh ka 01-04-21 hadooh ka 31-12-21 da em 1,414 ngut ki wym toh ki Muslim kiwa wan na Pakistan, Bangladesh wa Afghanistan kiwa da pdiang hapoh kani ka aiñ yow man noh kam ki tre chnong ka ri India.
Discussion about this post