Ha kini ki sngi wow wan, i dor i doh syiar (Broiler) hapoh Ri-loom Jaiñtia daw ku i katkam i ong ki kattu katni ngut kiwa khayi ya kini ki jait syiar ya kiwa da pynkit cha Jowai, Ladrymbai wa kiwi ki thaw.
Katkam ka yutip wa yoh wei hawa yaklam wa ki kattu katni kiwa khayi ya ini i doh (ki wym kwah wow pynmih pyrtuid) da ong ki wa hapoh chi bnai kattu (nadooh ka 24 Kmaichonglad 2021) da em hadooh 5 tylli ki kari (Pickup) kiwa kit ya kini ki jait syiar kiwa da chah noh cha synrang ha tymbud u sarokbah na Shillong cha Jowai.
Da khana ki wa heipor wa jia ini da wanrah ya ki syiar na Assam wa na Ri-Bhoi District, wei da chah yang-kdong kini ki kari ha sarokbah hapyrdi u sarok na chnong Puriang, East Khasi Hills wa ha Wahmynsoo, Mookyndur (wa langam u sarok) wei hadien ini da pynhiar ya uwa yah ya kini ki kari wei da pynchong ya ki hapoh kawi tawon ka kari (Alto 800 wa lieh) katwa ya ka kari Pick-up da yah da kiwi tawon ki bru chwa wow noh ya ki cha synrang chirup wa ki syiar ha ki bynta uni u sarok.
Hadooh ynne ka sngi ki kari wa da chah noh (hapoh chi bnai wa dadep) da em kiwa chah noh ha Wahmynsoo wa ha Riatturiem wei hadien wa chah noh ki da pynlait noh ya kiwa yah khlem chah pyntakha pynmynsoo tangwa da takit donhi ya ki tre yong kini ki syiar.
Neiliang kiwa boon kiwa kreh ha kani ka kaam khayi da tieñsar ki wa boi neini namo ha ki sngi wow wan daw chah noh wot ki kari yong ki leh kamjooh.
Heijooh i por neiliang kiwa khayi da kyntu ki ya ki bor sorkar khamtam ki bor pulit wow leh yeiwa emkaam hajrong ini.
