Jowai : Hadien wa da em i chah tyrrah chah lymbub ki bru ha ki bynta u sarok New Hill dei langær wei wow pynduna yeini waroh, ki pulit pyllai kari ka Jowai Traffic Cell da chimkhia yeini.
Ki bor pulit da ong ki wa i daw wa kongsan yei chah tyrrah ki bru ha lynter uni u sarok New Hill nadooh na Dowell Auto hadooh wa poi ha Police Point toh wa ym em u pynche kiwa ya yah ya ka Head Light (High & Low Beam). Ini i tympleh light da leh kiwa boon nadooh i janmiet (wada kem rngu) hadooh wa langoh, namo em kiwa pynche du da ki parking light heipor wa yah ki. Yeini i tympleh light toh khamtam heipor wa hiar ki kari na Ladthadlaboh cha Iawmusiang.
Ynne kiwa pyllai kari næ ki pulit ka Traffic Branch da pynman ki wow sylli (checking) syndet heipor janmiet nadooh 6:30 hadooh 7:30 i miet ha laad Circuit House.
Ha ini i checking da ksoh nadooh ki kari kamai, ki kari samen, ki kari kit mar, ki shaktiman, ki thut thut, wa kiwi kiwi wei da ksoh ya ki neidaw wa tympleh light ki heipor wa lai, wa pynemkaam ki da ki bulb LED kiwa boon rong, kiwa pynemkaam da kiwa khlan wei tyrchaaiñ ware ki light hadooh kiwa wa mar pyrchah ym chynna de ki, kiwa pynche du ka wi donhi ka light wa kiwi kiwi wei em kiwa chah ksoh kiwa yah ym em license ki, ym em kot kari, wa kiwi kiwi.
Ha kani ka checking em uwa yah thut thut neidaw ya yah u deiwa tympleh head-light dajan tyrrah u leh ya uwi u pulit wa em heini.
Waroh ynne ka sngi da ksoh hadooh 32 tylli ki kari wa kynthup ya kawi ka thut thut.
Boon na ki da phah wan hajir ya ki cha thanat wei daw chah daiñ kuna ki iwa duna dooh T. 500 wei lada ym biang ki ya ka license wa ki kot kari ye ki leh u chah daiñ kuna rap boon.
Da pyntip ki bor pulit wa daw leh yeini dei langer ha kiwi kiwi ki thaw.
Discussion about this post