Jowai : Dang ha kini ki sngi wada dep da joor u slap ka lyær kawa da syllad ya kiwa boon ki thaiñ ka ri-loom Jaiñtia khamtam ka Elaka Satpator, Loomchnong, War Jaiñtia wa kiwi kiwi kiwa da ktah joor ya ki yung ki sem ki paidbah.
Ynnin ka 28 tarik u slap wa joor ryngkat ka lyær wow phria da syllad ki yaki chnong kiwa em ha ki bynta ka Amlarem Sub Division.
Ha ka chnong Padu ki tnoom yung wa boon da pai thlu ki neidaw wa haap u phria, wei neiliang u ma N. Pohthmi uwi naki wachong chnong ha Padu da ong u wa u phria wa heh da pynjæt u yaki tnoom yung ka tyndur kawa em hapoh kani ka chnong. Wei da sap biang ya ki tin ki tnoom wa pai pyn ynne ka sngi. Ka kong Annimi Lamin da ong ko wa u phria uwa heh kat ka bol kriket da siamthlu u yaka tin wada tymmoh yei yung yong ka.
U ma O. Mukhim uwi won u uwa chong chnong ong u wa boon ki kari da takha i doh yong ki neidaw wa joor u phria khamtam ki yit yong ki artylli ki kari u wa ka tnoom ka L.P. School ka chnong Padu leh da paithlu lut ko.
U Tohmondiam Mukhim u President ka VDP ka shnong Padu da ong u wa katkam wa kheiñ yong ki ym duna yaka 50 tylli ki yung ha chnong Padu da chah ktah ki na u slap, ka lyær wa u phria.
Ha chnong Sohkha Model ka tnoom yong ka yung ka kong Marwein Pohtmi da chah khyndang ko haka lyær wei da chah rong ki tin cha jngai bha wei em leh ki tin wympu chem hadooh kattæ. Weiwa da haap ki u lirieh cha ki janyung yow yoh i yada wa pura na u slap ka lyær. Heijooh i por ka tnoom ka skur S.R. Mannar L.P. School ha Sohkha Model leh da chah khyndang ko wei ympu ye de u pynemkaam ya kani ka yungskur.
Heijooh i por u slap ka lyær chirup wa u phria da ktah bha ki ya ki mar rep yong ki khamtam u pathi, wa kiwi kiwi.
Ynnin i janmiet heipor kamwa 5 waje won da wan leh ka lyær wa joor bha hiewa da khyndang ko ya ki yung wa boon ha ka chnong Amlarem.
Ha ini i jia da boon ki yung wa da chah tympra wei da em leh ki yung khian kiwa da chah khyndang nadooh na tre.
Discussion about this post