Shillong: Hadien wa mih i khñium wei kusa mynsien ki paidbah ka jylla hajrong i wym chimkhia ka sorkar wow pynchitom ya ki 41 ngut kiwa lai chimbynta ha ka khawai bia, ynne ka sngi neiliang u Montri Rangbah ka jylla, u Conrad K Sangma da ong u wa ka sorkar yakhun ko wow pyndooh pynwiar noh ya uni u khñiang khlam COVID-19 ha ka jylla.
Da pynsñiaw u leh wa ka sorkar khuslai ko yei ku i yoh ki bru ya uni u khñiang hanla i poor man i du ha ki kattu katni donhi ki bynta wei ka sorkar u leh ko yeiwa emkaam.
Chooh chooh da ong u wa ki bor District da kreh chitom ki wow khoom u kdoh ya uni u khñiang khamtam i psiah i mih ki baar jylla wei emkaam leh ya ki paidbah wow chimkhia ki hajrong ini wow lait nei poor uni u khñiang.
Hajrong ka ujor mukotduma pyrchah ya ki 41 ngut kiwa lai baam khawai bia, neiliang u Conrad da ong u wa ya kini ki bru da pynngat ha ka Section 188 ka IPC, wei ka aiñ daw leh ko yeiwa emkaam katkam ki kyndon aiñ deiwa pynrap leh wa ini u man i ka nongmuna ya kiwi tawon kiwa ye u tyngkheiñ ya ka aiñ.
U Conrad da pyntip u leh wa ki sahep ka sorkar kiwa yachem ya kiwa em khñiang, da bahkhlieh ki wow lai phah sylli (test) wut-wut pyn daki yaki hi wei hadooh ynne ym em kiwa yoh ya uni u khñiang.
