Hadien wa ka sorkar da chna ko ya ka All Party Committee (APC) neibynta wow ya syllok heiyatoh wa ka luti rel hapoh ka jylla, kani ka Committee hadooh kattæ ym pu em ye ko wow chong yachem neidaw wa em ki seiñ saiñpyrthai ki wym kwah wow embynta hapoh kani ka APC.
Hawa yaklam wa kiwa thoh khubor, u Conrad Sangma kam u Montri Rangbah da ong u wa ym ye wow sñiawthooh neibhah em boon ki bru kiwa da ong wa toh u em da ka Committee yow yasyllok hachwa wow rai hajrong ka luti rel, tangwa kitæ ki bru won kattæ ym kwah ki wow embynta won ha ka Committee wei ymtip iyi mut ki hawa klam won ki chaphang ini hapoh ka yung dorbar.
Da ong u wa hanla ki seiñ saiñpyrthai ym kwah ki wow embynta ha ka APC, neiliang ka sorkar u lai ko chakhmat wow yasyllok wa kiwi ki seiñ saiñpyrthai kiwa kwah wow chimbynta.
Neiliang u Conrad da kyntu u leh ya kiwi kiwa embynta wow wan chakhmat wa kynthup ki seiñ saiñpyrthai yow yaklam hajrong ka luti rel.
Katkam i ong u Montri Rangbah, neibynta wow ku i yoh i kot, ka luti rel toh kawa emkaam, lada toh ha Khasi Hills, Jaiñtia Hills næ Garo Hills, tangwa da ong won u wa ini i kaam toh iwa khia wei man ko kawa emkaam wow kynthuplang ya ki paidbah ha kawon kawon ka rai wa ka sorkar chim ko.
Discussion about this post