Jowai : Ka Raij Nangbah toh kawi na ki Raij ki chnong kawa dang leh dang pyndep ya ka rukom dustur wayah watyor ki warim ki longchwa manchwa kawa tip kam ka Chad Sukra. Kamtæ ki khon ka Raij Nangbah kam chibynta wow pyndep ya kani ka rukom dustur wa chisien chisnem ha kani ka sngi Musiang 2 tarik u Naitung dachim ki wow mih paidbah u pynyoo hakhmat ka pyrthai yei man kyrpang kani ka sngi hapyrdi i riam i bait wa yoophooh yoophieñ wa ki sur rwai sur chaad wa sñiawsuk sñiaw tympang kiwa mih lyngba ki tiar tem tiar put yongrim.
Ha kani ka sngi nalor ki khon ka Raij ka chnong wa ki lok ki jor najan najngai dawan wow sakhilang ya kani ka sngi da u Moonlight Pariat, MDC, JHADC wa man leh kam u kongsan yong kani ka sngi.
Ha kani ka sngi chwa wow yoh u yoo u sakhi ya ki chaad wa boonrukom wada pynkhreh na ki dong ki chnat waphær wpahær yong ka Raij Nangbah da em chwa ka yalang wa tbian heiwa u waheh M. Garod, Doloi Elaka Nangbah daman u kam u chongknor we da yoh leh i klam i kape na ki waheh wasian ka chnong Nangbah kamjooh leh kiwa na kiwi tawan ki chnong ki Raij chaphang ka yurim yong ka Chaad Sukra wa ki bynta ka Bei Rymaw.
U ma Moonlight Pariat hei e ya ki kyntien kam u kongsan, da yaroh u ya ki khon ka chnong Nangbah kiwa da chimkhia wow pynman ya kani ka rukom dustur na ki snem cha ki snem wei nalor neitæ u booh u leh ki kyntien kitbok kitrwiang dei wa ong kyrmen wa i rep i riang ha hali pynthor u man i iwa miat wabha deilang wei yoh ki khon ka chnong ka thaw yei roi i paar ha waroh ki liang.
Chwa wow poi cha ka bynta wa kut yong kani ka yalang neiliang u ma Lakhon Biam, Vice- President ka Seiñraij Nangbah da e u ya ki kyntien khublei.
Ki rukom chaad kiwa dasai da pynyoo da ki khon ka Raij Nangbah kamjooh leh da kiwi tawan ki Raij kiwa dawan yachimbynta ha kani ka Chaad Sukra toh ka Chaadpliang, Chaad Kyllaiñkti, Chaad Rwai wa kiwi kiwi.
Discussion about this post