Shillong: Ka yung krehkaam u Additional Deputy Commissioner (ADC) ka East Jaiñtia Hills District da phah ko ya ka chithi wow khut hajir ya ka President ka Civil Society Women’s Organization (CSWO), ka Agnes Kharshiing, wot hapyrdi wa chah sumaar na i chah thombor ha ka 8 tarik uni u bnai ha Shohshrieh, East Jaiñtia Hills.
Ya ka chithi wa soi da u ADC, u SS Syiemlieh, da phah ya ka Agnes wow wan hakhmat u ADC ha NEIGRIHMS Hospital wow e jubab khnang wow lai bait ka takit.
Kam wow pynkynmoo heini neiliang u Deputy Commissioner ka EJH da hukum u wow pynman da ka takit wa bniah wow chem yeiwa sakhiat hajrong i chah dat ka Agnes wa ka Amita Sangma ha ka 8 tarik.
Kam kani ka chithi phah hajir da phah leh cha ka Amita kawa da sdang yohbor na i chah sumaar.
Hajrong ini neiliang u diah ka Agnes, u John F Kharshiing da ong u wa hadooh katni dang ye wow yaklam dang du wa ka Amita, katwa ya ka Agnes won dang em ko hei chitom wa joor.
Da pyntip u leh wa ka Agnes dang chah sumaar ko ha ki bynta ka khlieh, ka Neuro Surgery Ward wei daw rap chimpor wow khlan ya ka neibhah dang em ki bynta wow sumaar chooh ya ka.
Discussion about this post