15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Lehwarom ka Seng Khasi ya ka Seng Kut Snem wa 119 yong ka

0 Comments
Advertisement ad1
Advertisement ad1

Shillong: Ka Seng Khasi Seng Kmie Shillong ynne ka sngi da lehkmen ko ya ka Seng Kut Snem wa 119 kawa da wan sakhi da ki phaw hajar na kylleiñ ka ri Khasi wa Jaiñtia næ ka Bri u Ynñiawtrep wow chimbynta chongchit wow pynphooh pynphieñ ya kani ka sngi.

Ya ka lehkmen da sdang da ka ngoohblai kawa kawa da pynman heipor 8 waje i step ha Ïing Seng Mawkhar wei da pynhær ya ka lama ka seiñ wei da pynbood won sa ka ‘ Ïaid Pyni Riti’ kawa da sdang na madan Ïewrynghep hadooh ka lympung Weiking Jaïaw nadooh i por 10 waje i step.

Da pynman leh ya ki program wa kyrpang ha i por 1 waje sngi ha Lympung Weiking, Jaïaw, heiwa ya i kñia i khriam katkam ka niam ka rukom da pyndep da u Rgh. Skor Jala wei da yoh ya i klam na ki ar ngut kiwa klam ha uni u snem u Rgh. Synroplang Kharshiing uwa man u Asst. General Secretary ka Seng Khasi Kmie wa na u Dolloi ka Elaka Jowai, u Puramon Kynjing.

U Rgh. Synroplang hawa e i klam ha kani ka sngi da yaroh u ya ki 16 ngut ki khynroo wa da seiñ ya ka Seng Khasi ha ka 23 tarik u Khonchonglad (Nov) 1899, wa ya u Jibon Roy Mairom uwa da kitkhia ya kani ka lai luti ki khynroo khyllood.

“Nadooh kiwa jia ha u snem 1833 ter ter hadooh wa jan kut ka spah snem wa 18 da pynlynga ya ki kñi ki manpa kiwa ha tympha yong kiwa da kitkhlieh ya ka yap ka im, i da yoo i wa da wan i pynthymme kawi hadien kawi won, nadooh ka synchaar khadar thymme, ki chnong ki thaw thymme wa wan leh ka rukom pyrkhat wa ka rukom ngait kiwa thymme yong kiwi, wei toh nadooh ki snem hadien ka 1903 wa ka rukom krehkaam ka Seng Khasi da phær wei ym em mut wow kut ko du hei wow pynneh ya ka akor ka burom wa ka riti, tangwa da haap ko leh wow pynpsiah u pynneh wei wow pynim ya ka niam ka rukom tynre u khon Khasi khara,” da ong u.

U Rangbah ka Seng Khasi da ong u wa chisien pait wa chisien pyrkhat da yoo maa cheiwon u poi ka jaitbru, tangwa neidaw wa man ko ka jaitbru kawa ngooh kawa dem ha u Blai Tre Kynrad, ha ki Ryngkaw ki Wasa wa ngooh wa dem ha ki Thawlang wa ki Ïawbei, toh ki kiwa sai ya ki sim pah sim song, ki khroo pyrkhat pyrdaiñ wow yahkhmat ya ka jaitbru yow lait ko u haap u oor katwa lai i por.

U Rgh. Synroplang da ong u wa ka i khlan ka jaitbru ym chong ko ha i heh paaid deiwa e nongmuna ya ki Roman kam kiwa man kiwa heh paaid neibhah em ki sap wow yakhun thma wa ka sap synchaar kawa da pynman ya ki wow jop ya ka pyrthai, kamjooh ki jaitbru Jew kiwa da em ka maya ya ka riti ka dustur yong ki kawa pynman leh ya ki wow man ki kiwa satar wow yaichah ya i chah thombor hadooh wa ki da yoh biang ya ka thaw yong ki.

“Hawa i kyruiñ won i cha ka jaitbru yong i kiwa khian paaid, chem wa i leh kam kiwa khian paaid i leh em i ka yong i kawa kyrpang hawa nujor wa iyi wa ka pyrthai em ko, wei chem wa i ym em duna i iyi iyi leh. Ka pyrthai ym pu em yimphoo ko ya ka synchaar paidbah, tangwa ha i da soohthied wei da phooh syntu ha ka rukom pynlai ya ka khyndaw ka chyiap leh ym em duna i iyi iyi leh,” da ong u.

Uni u Rangbah da ong chooh chooh u wa ka pyrthai ym pu tip ko wow e kyrdan ya ki kynthai, tangwa ka jaitbru Khasi da em ko u mooyurim neibynta ki kynthai. “Heiwon u chem ya ka jaitbru kawa pynchong yurim ha ka Tip Kur Tip Kha,” da ong chooh chooh u.

Ha kani ka sngi da yoh leh ya ka ki rwai na ki khynroo khyllood ka chnat Seng Khasi waphær waphær, ha i jooh i por da pynkup burom leh ya ki chynrang wa kynthai kiwa da leh bha ha ka puræ puthi ha ki kyrdan waphær waphær.

Hadien wa da dep na Madan Weiking da pynman ya ka lai paidbah deilang wa ka phawar cha Yung Seiñ ha Mawkhar hei por janmiet.

Share this:
Previous

Hapyrdi i chah sumaar chah hajir ka Agnes ha u ADC ka EJH

Next

Wow chim ya ka Injection Ñiangpyrchit chong ha i sniawthooh yong samen ym ye u pynbor: Al Hek