Ki soo sngi le yaw yong ka Behdieñkhlam ka Raij Jowai kawa da sdang nadooh ka 11 tarik, dapoi noh ko chawa kut ynne ka sngi hapoh ka Syiem Aitnar hapyrdi i phooh i phieñ ki rot wada wanrah da ki dong waphær waphær deilang ki khubor cha ki paidbah deiwa choh deilang ki bom ki bhuri wei da wan sakhi da ki hajar ngut hadien ar snem deiwa yoh u chimbynta lang ki paidbah.
Ha kani ka sngi da wan sakhi lang leh u Chief Justice ka Meghalaya High Court u Sanjib Banerjee, u Arjun Ram Meghwal, Union Minister Parliamentary Affairs & Culture ka sorkar India, u MP ka Rajya Sabha, u W.R. Kharlukhi, u Sanbor Shullai, Minister ka Art & Culture Dept. Meghalaya, u Metbah Lyngdoh, Speaker ka Meghalaya Legislative Assembly, u Kyrmen Shylla, Minister Social Welfare wa kiwi.
Ki rot wada wanrah hapoh Syiem Aitnar kynthup yong ka Seng Khasi, Umchangiar, Iongpiah, Chilliangraij, Panaliar, Dulong, Tpep Pale, Ummulong wa kiwi kiwa da palat ya 13 tylli neibhah em haroh ki rot khian.
U Rot yong ka Tpep Pale da wanrah u ka khubor hajrong i chah kdoh chah khoom ki bru haka Social Media, hei dih pynmuaid waphær waphær, haka spah wei da kyntu leh wow yait yeini.
U Rot ka Khon Ñiamtre Iawmusiang da wanrah u ka khubor wow yada yaka rymaw wei u pyndooh pyndam yei sih wa boon jait haka imlang sahlang.
Hawa e yei klam, neiliang u Sanjib Banerjee, u Arjun Ram Meghwal wa u Metbah Lyngdoh da e khublei Behdieñkhlam ki yaka Seinraij Jowai kamjooh waroh kiwa wan sakhi, wei yooluti haroh ki wa kani ka Behdieñkhlam u wanrah ko i kyrkhu ha kiwa boon ki liang haka imlang sahlang.
Hadien wa kut ka lehkmen hapoh Aitnar, neiliang u O.R. Challam, President Seiñraij Jowai da pynsñiaw u i sñiawngooh ya waroh kiwa embynta ha kani ka Behdieñkhlam wa kynthup ki bru samen, ki chnat krehkaam waphær waphær.
Kam u pynkynmoo wa chibynta ka Behdeiñkhlam toh hajrong ka yurim u beh yaka khlam, i kjut chitom wa i sih wa boon jait haka imlang sahlang deiwa e ngooh ya u Tre Ki Rot wa ha khlieh tam.
Ynne ka i step ka sngi khaddooh dang step da em ki lehniam waphær waphær kamjooh leh i Kyntiñ Khnong ha yung Langdoh.
Hei noh chariñ sngi won da wanrah ki ya ki rong ki rot hapoh Aitnar wei da pynhiar leh ya u “Symbood Khnong” ka “Khnong Blai” najrong ka Dieñkhlam ka Bon wa na yong Langdoh.
Heipor wa pynhiar yaka “Khnong Blai” waroh ki khon ñiamtre da yaknieh ki u yoh tba nyngkong yaka deiwa ngait u yoh i kyrkhu kyrdoh.
Neitæ heipor janmiet won da em ka Datlawakor hapyrdi u Langdoh naka Pynthor Wah pyrchah ya u Sangot Paswet uwa yieñ naka Pynthor Neiñ heiwa da jop da u Langdoh, wei katkam i ngait hi ha uni u snem, u khoo u kba daw bha u cha ka Pynthor Wah.
