Hapyrdi i phooh i phieñ da pynkut yaka Lympung KSKSR ha chnong Nongkynrih

Ha uni u snem ka Lympung Ki Khynnah Sengkhasi Seinraij da man ko ka sien wa 18 wei da pynman yaka haka sngi Hat 20 tarik waka sngi Khyllaw 21 tarik uni u bnai ha chnong Nongkynrih ha i thaw wa tip kam ka Madan Siej Kynden, Laskein Block, West Jaiñtia Hills kawa haap hapoh ka Elaka u Dolloi Raliang.

Hei yoh u sakhi ya kani ka Lympung ha ka sngi khaddooh da chem wa ki khynnah Seng Khasi Seiñraij na kylleiñ ki loom Khasi-Jaiñtia hei pait i pynlai kiwa sikai yong ki chlem sikai Niamtre, Niam Khasi waphær da wan ki wow ya chimbynta chongchit hei riam i bait wa yoo phooh yoophieñ wei yoo chongkhia chongkun.

Ha kani ka step yaka lympung da pynlai da ka Tyngkai I Man Synnah waka Wailadmi Dkhar wei da kdar yahkhmat da i Ngoohblai Ngoohsyiem wa da siang da booh da u Mehiapia Suchiang yong ka Seiñraij Nongkynrih neitæ pynbood won ki kyntien pdiang burom naka Kamwadamang Synnah yong ka Seiñraij Nongkynrih. 

Ki ar ngut ki khynnah kiwa da yieñ wow e yei klam i kappæ ha kani ka lympung toh ka Dawakiru Malang na Seiñraij Jaraiñ, East Jaiñtia Hills kawa da klam hajrong ka phang wa ong ‘Pynkyntang yei rynyieñ da ki adong Blai’ neitæ ka Klistina Synteng won da klam ko hajrong ka phang wa ong ‘Ka bynta ki khynnah ha ka Seng Khasi-Seinraij’ kawa da mihkhmat na ka Seng Khynnah Seng Khasi Pomlakrai, Mylliem Pyllun.   

Ha kani ka lympung da wan sakhilang e mynsien leh ya ki khynnah da ki Dolloi, ki Chakri Niam yong ki Raij ki chnong waphær, ki manbei manpa, ki khynroo khyllood wa ki waheh wasian na ki chnat Seng Khasi Seiñraij waphær waphær yong ka Ri-loom Khasi-Jaiñtia.

Neiliang ki bor pait bor pynlai kani ka lympung kiwa kynthup yow General Secretary, u S. Pyniaidsuk Lyngdoh uwa da chim ka bynta wow pynsñiaw yei lai luti ka seiñ kamjooh ki kyntien na u Treasurer, u Gideon Kharmawphlang uwa da khana yaka thong i angnood ka seiñ wow kreh neibynta kammon u saiñdur saiñdar ya ki khynnah ha ki Chlem Sikai waphær deiwa pynmih ya ki kot Khanna Niam yong ki Raij ki chnong waphær kamjooh leh yow ye u yarap yaki khynnah ha kiwi ki rukom ki wow e myntoi ya ki ha ka mynstep man kawi.  

U Aiban Swer, (Retired) Additional Director Soil & Water Conservation Department, ka sorkar Meghalaya hei yieñ wow e ki kyntien kam u kongsan, da yaroh u ya kiwa yahkhmat kani ka lympung kiwa dachim ka yukit wa khia neibynta wow tyoor luti ya ki khynnah Seng Khasi-Seiñraij heiyatoh wei  tip niam tip rukom, neitæ kyrsu kyntu u leh ya ki khynroo khyllood, ki manbei manpa deiwa ong to man ki bru wa tip u ksoh u kune yei man kyrpang ka jaitbru Ñiawtrep Ñiawskum nadooh ka niam ka rukom, dustur riti khnang wa ki pateiñ wa hadien yow tip ki u bood late yeiyi iwa da yah da tyoor luti kam ki pateiñ u Ñiawtrep Ñiawskum ha kani ka juk ka por wa katni.

Pachat u leh ki kyntien sneiñ kyntien kroo wei e mynsien ya ki khynnah kamjooh ya ki khynroo khyllood deiwa ong kynmoo wow ri syndong yei burom i akor na yung ha lait wei wow saiñdur saiñdar yei longbru manbru wa miat wa bha ha ka yurim yong ka Tipbru-Tip Blai wei Kamai Yei Hok.

Kyrpang chooh, kyrsu kyntu u ya kiwa sikai wa em ha ki chnat Seiñ Khasi, Seiñraij waphær deiwa ong, yaleh wow pynjanai yei tip wei chemphang yong phi katkam i yah ka juk ka por neibynta wow ye phi u kriñ ya ki khynnah yow man kiwa sñiawsuk sniawka-it u leh ya iwon iwon i kaam da ka luti yong i sñiaw maya khamtam hei wow ye u saiñdur yei long i man wa miat wa bha i yong ki da ka luti yong i ya maya, ya tylli wei ya burom kylliang.

Ha kani ka lympung najrong i klam, i kappæ da yoh leh ki rukom lehke pynwyrngia wa boon jait boon rukom kam i leh Drama wa tbian katkam ki parom yongrim, ki rwai, ki chaad kiwa da leh da pynyoo da ki khynnah Sengkhasi Seiñraij, i puræ ya ki ktien tymmen kiwa man ki kyntien sneiñ kyntien kroo ya ki khynnah hajrong i burom i akor neitæ i pynkup burom wa kyrpang leh ya ka Mera Dkhar wa man kawi na ki manbei wa seiñ wa sdang ya kani ka Lympung Khynnah Seng Khasi-Seiñraij.

Khaddooh chwa wow yoh ki kyntien khublei na ka Opaiadaka Dkhar, da em chwa i e kti ya ka Dongmusa na u Waiphang Suchiang, Seiñraij Nongkynrih Laskein Pyllun ha u Bansarabanbha Kharsawkpoh yong ka Seng Kynnah Seng Khasi Ri War Mihngi kawa man ka chnat Seng Khasi wow chimkti u pynman yaka Lympung wa 19 ki khynnah Seng Khasi-Seiñraij wei da pynkut ya kani ka Lympung wa 18 da i pynhiar yaka lama da u Dolloi ka Elaka Mynsoo.