Hapyrdi i pyrthai mynder wa miat wa bha pyndep ka Raij Chyrmang ya ka Chaad Ñiam Behdieñkhlam

Ka Chaad Ñiam Behdieñkhlam toh kawi na ki chaad niam wa bna naam ka Ri Loom Jaiñtia wa da leh da pyndep da ki khon ka niamtre ha ki kattu katni tylli ki raij ki chnong, kamtæ ka Raij Chyrmang kam kawi na ki raij wa yoh bhah yoh bynta wow sdang nyngkong ya ka Chaad Niam Behdieñkhlam ha kani ka tayaaw yong ka sngi Khyllaw 24 tarik Naitung, u Langdoh Kongwasan Chyrmang chirup kiwi ki chakri niam ka raij da sdang ki u pyndep ya ki sarin yong ka lehniam kat hadooh wow poi ka sngi khaddooh wow pynkut ya ka Chaad Ñiam Behdieñkhlam ynne ka sngi Mulong.

Ki rukom lehñiam næ knia e ngooh kiwa da pyndep da ki chakri niam ka raij heiyatoh wa ka Chaad Ñiam Behdieñkhlam ha Raij Chyrmang toh ka Than Blai, Thoh Langdoh, Kñia Ryngkaw, ka Hat Khrong, Ka Kamcharoh Blai, ka choh thyndai wa kiwi kiwi.

Ha uni u snem ya ka Behdieñkhlam ki khon ka Raij Chyrmang ha Aitnar da wan sakhilang leh da u Lahkmen Rymbui, MLA ka thaaiñ kam u kongsan, u Pa Dolloi ka Elaka Jowai, u waheh Puramon Kynjing, ki Langdoh, ki Wasan na kiwi ki Raij wa ki waheh wasian yahkhmat ka Niamtre na ki chnong ki raij waphær waphær.

Ki rot ki rong waroh kiwa da wanrah kam chibynta wow pynphooh pynphieñ ya ka chaad ha Aitnar da em ki hadooh 8 tylli heiwa hapyrdi i sur wa ood wa thai yong ka bom ka bhuri, ka chaad da man ko kawa yoosuk yoochongchit wei phooh wei phieñ dei chimbyntalang leh ki khon kynthai khyllood hei riam i bait wa boon rukom.