15 49.0138 8.38624 1 0 4000 1 https://wyrta.com 300 0

Hapyrdi u slap ka la-ær skem ka yalang paidbah ka KAS wow dawa tipmit noh ya ka ktien Khasi

0 Comments
Advertisement ad1

Shillong: Da ki hajar ngut ki paidbah da chimbynta ki ha ka lai paidbah yong ka Khasi Authors’ Society na Madan Iewrynghep cha Madan Malki, Shillong. Kattu katni ki bru wa pawkhmat ha ka imlang sahlang da e ki yei klam wow dawa wow tipmit noh wow kyntup ya ka ktien Khasi ha ka riti synchaar ka ri India wei wow pynche hajrong kani ka phang wa ki myntoi wow yoh manda leh yeini.

U kongsan ha kani ka sngi u Payiem, P. Syiemlieh, Syiem Hima Nongkhlaw da kyrkhu kyrdoh wei da klam chit mynsien u hajrong ka phang wa nadooh u snem 1960 ka jylla Assam da thmu ko wow pynpsiah ya ka ktien Assamese ha waroh kawi ka jylla kynthup ya ki Raij ha Ri Khasi Jaiñtia wei da yakhun hadooh wow yoh ya ka jylla wa laitlooid ka Meghalaya ha u snem 1972.

Advertisement ad1

Da yoh ya ki kyntien lamphang na u da u President ka KAS u Dr. DRL Nonglait heiwa da kyntu ya ki paidbah wow em i kitkhlieh wow kyrchaan ya ini i yakhih.

Ki paidbah na ki lympung waphær waphær da chim bynta ki ha i lai paidbah ya iwa yahkhmat da kiwa yah thuk-thuk ya kiwa da bood da kiwa yahkhmat ka KAS ryngkat wa ki dkhot, ki khynroo ka Khasi Students’ Union da rwai chongchit ki da ki phawar wa chongkun ha ryngkat ki khynnah wa ki khynroo khyllood wa da lai puræ.

Ha Madan Malki da yoh yei klam na ki waheh wa kynthup ya u Samuel B Jyrwa, President ka North East Students’ Organisation; Prof. Antionette Kharmalki, khlieh ka Khasi Department, North Eastern Hill University;  Dr. P. Nongtdu, Principal ka Jaiñtia Eastern College; Dr. S. Loniak Marbaniang, wa da chongngiah na NEHU; Dr. Bajubon Roy Kharlukhi, wa kiwa mihkhmat Member of Parliament wa nachwa ha Dorbar Chna-aiñ Ri wa u khlieh warim namo u Principal ka Union Christian College, wa kiwi kiwi.

Da pynche wa kammon hawa tipmit ya ka Ktien Khasi u yoh myntoi ki paidbah ha ki khih ki kreh, i puræ puthi, wa kiwi ki kaam ha ka imlang sahlang.

Chooh chooh da ong wa ki kyndon wa booh ka Sahitya Akademi neibynta kani ka phang, ka ktien Khasi da palat ko ha kiwa boon ki liang nadooh i boon bru kiwa klam ya ka Ktien Khasi, i kordor wei kynsai ka ktien eei da chon da pynmih leh boon tylli ki kot Khasi hawa wyrchaw wa kiwi ki ri-loom hapoh ka ri India.

Hajrong ini ka Antionette Kharmalki da kdaw ko wa wot ka sorkar pharæng chwa wow yoh laitlooid ka ri India da chem ko wa ka ktien Khasi man ko kawa kordor wow booh tnat puræ wot ha Calcutta University, hadien da pynbood ha Guwahati University hadooh wa da em ka kyrdan wow tih bniah ha ka Ph.D.

Da em leh kiwa kyrpaad ya ki bru saiñ pyrthai wow wanrah yaklam ha Dorbar chna-aiñ jylla wot hadooh yong ka ri wa em ha Nongbah Delhi.

Ki paidbah kiwa wan da pynyoo ki yei mynsien ya tylli deiwa chah ya u slap ka la-ær ha kani ka yalang ynne ka sngi.

Ya kani ka sngi da pynphooh da ki rwai na ki khynnah puræ ka Lady Keane College, Shillong wa Thomas Jones Synod College, Jowai.

Advertisement ad1

0 Comments

Leave a Reply