Jowai: Ki para wa ngait ka Balang Katholik Kyndongtuber, Mooksiang Parish, West Jaintia Hill District, kiwa lehkmen yei dap 100 snem i wan ka Balang Katholik ha chnong yong ki, da pynkut ynnin ka sngi da ka Proseshon Iukharist heiwa da ki hajar ngut ki para wa ngait napoh ka Jyllaniam Jowai, kiwa ngait na ka Balang Presbyterian, Church of North India wa kiwa ngait ya ka Niamtre da wan ki wow sakhi ya kani ka pynkut dap chispah snem i wan ka Balang Katholik ha Kyndongtuber.
Ha ka i step heipor 10:00 waje da pynman ya ka knia Mass wa khooid kawa yahkhmat da u Most Rev. Victor Lyngdoh DD, Bishop ka Jyllaniam Jowai hei synran lang ki Lyngdohsohblei kiwa wan na ki Parish waphær waphær yong ka Jyllaniam wa nabaar.
U Bishop Victor ha i klam sneiñ kyntu da batai u ya ki ktien u Blai ya ki paidbah, da pynsñiaw ya i kmen wa khroo wow chimbynta lang wa ki para wa ngait ka Balang Kyndongtuber heiwow pynkut ya ka lehkmen dap chispah snem i wan hiar ka Balang ha chnong yong ki deiwa engooh ya u Blai wa ha kini ki spah snem kiwa ngait ka Balang da ku ko hei boon paaid wa hei maya ya u Blai.
Heijooh i por da pynsñiaw u yei kmen wa khroo yei wan chim bynta ki para Khristan na ka Balang Presbyterian, Church of North India, kiwa ngait ka Niamtre wa kiwi kiwi kiwa da wan sakhi ya ka sngi pynkut ya kani ka lehkmen chispah snem ka Balang Katholik ha Kyndongtuber wei wow yaroh ya u blai uwa da manbru cha pyrthai.
U Bishop Victor hawa e yei klam ha kani ka sngi hajrong ka phang pyrdi “U Jisu Khrist u la jop ia ka jingiap bad u la mihpat na kaba iap bad ka jingmihpat jong u Khrist ka dei kaba shisha”. U Bishop Victor da ong u wa ympu em u loom tlep-bru uwa da wai thylli waroh ki thaw tlep yong ki Syiem ka pyrthai, u Syiem Pharo ka Egypt, ki Kaisar yong ka Rome, ki Syiem Raja yong ka ri India, ki Patsha yong ka France ym thylli ki kamwa thylli ka thaw tlep yong u Jisu wot lada em kiwa yang wow pait bha heipor tlep, laitnoh du ka thaw tlep yong u Jisu wei yeini da pynsakhiat na i klam u Jisu wa ong “ NGAN SA PYNPRA IA KA TEMPLE BAD HADIEN LAISNGI NGAN SA PYNIENG BIANG IA KA”( Ioannis 2:18).
U Khrist da jop u yei yap wa yei pap deiwa mihpat biang u iwa pynman ya i wow rwai “ALLELUIA” heiwa kam kani ka sngi wei ha waroh chi lynter i rukom im kam ki Khristan. I mihpat u Khrist da e mynsien ko ya ki bru wow mihpat chirrup wa u Jisu chisien ka sngi.
Neitæ u Bishop Victor da klam u hajrong ka kyntien u Jisu iwa ong “Suk kiba duk, ka Hima u Blei ka long ka jong ki” wei da maham u deiwa ong “Kyrdit ia phi kiba riewspah” ini i yalap u Jisu toh pyrchah yei pyrkhat ki Jew kiwa kheiñ wa ka spah toh kawi na i kyrkhu u Blai, tangwa hei yumut u Jisu waka spah hi barabor haap ki hapoh i sñiaw sarong samen. Ka spah pynman ko ya ki bru wow sarong wei wow banbeiñ ya kiwi wei ka spah hi pynngop ko ya ki bru ha kiwa bon rukom da pynrap u Bishop Victor. Neitæ u Bishop Victor da ong u wow man kiwa dooh ym man ki i kyrkhu wa sakhiat, tangwa toh u sñiawthooh wa hawa man kiwa dooh toh kiwa chaniah ha u Blai wei kiwa sñiaw khian wei wow sñiawthooh yei eh i khoo kiwi.
Ya kani ka sngi da pynphooh da ki rwai kam naka Trinity na Shillong wa na ka Choir yong ka Balang Presbyterian Kyndongtuber.
Heipor nohchariñ ka sngi da pynman ya i lai proseshon Iukharist hapoh ka chnong kawa da yahkhmat da ka Savio Juniorate Band Shillong wei mar sdang da hiar u slap tangwa ki khon ka Balang ym em randien ki.
Chwa wow yoh ya i kyrkhu wa kyrpang da ka Sakrament wakhooid tam ka Duwan da u Bishop, da yoh ya i klam hajrong kani ka sngi da u Fr. Ioannis War Pakma SDB wei chwa ini da yoh yei klam na u Fr. Joy, u Parish Priest yong ka St. Claret Parish Mooksiang.
Discussion about this post