Ka Behdieñkhlam man ko kawi na ki lehniam wa kongsan tam yong ki khon ka Niamtre heiwa ynne ka sngi ka Raij Chyrmang da pyndep ko ya kani ka lehniam ha Aitnar, Chyrmang, West Jaiñtia Hills.
Kani ka lehniam ka Raij da sdang ya ka nadooh ka 19 Naitung deiwa sdang ya ka Sdang Khrong Sdang Khri na ki Manyung Mansem wei nadooh kani ka sngi da sdang leh wow choh ya ka bom.
Da pyndep ya ki lehniam wa ki kñia jar jiar ki sngi kiwa man kam chibynta yong ka Behdieñkhlam kam ka Than Blai, ka Thoh Langdoh Kñia Ryngkaw, Hat Khrong, ka Kamcharoh Blai, ki Chaad Yung Chaad Thyndai wa kiwi kiwi hadooh wa poi ynne ka chi tarik wow pyndep ya kani ka lehniam.
Ynne i step tarik dang step da pyndep ya ka Chaad Yung Chaad Thyndai yeiwa da pynbood ya i Chaad ha Yung Langdoh na ka Chyrmang Neiñ wa Chyrmang Wah wa i Sehbhang.
Hei sngi, ki khon ka Raij da wanrah ki ya ki 9 tylli Rong ki Rot kiwa da chna nadooh ki sngi wa ki tayaw wa dadep wei ha Aitnar chirup wa i kieh ki bom, ki bhuri wa bikur, ki khon ka Raij da chaad ki wow pynyoo yei mynsien wa ka’it wa kmen ki.
Ynne ka sngi ya ka lehniam ha Aitnar da wan sakhi da u MLA ka thaaiñ uwa man leh u Montri ki kaam pohyung ka jylla, u Lahkmen Rymbui, u Montri ki kaam bhalang, u Kyrmen Shylla, u Dolloi ka Elaka Jowai u Puramon Kynjing, ki MDC ka JHADC u Saron Paswet, u Lasky Rymbai wa kiwi kiwi.
U Kyrmen Shylla hawa e i klam ha kani ka sngi da ong u wa kani man ko ka sien wa nyngkong wa wan sakhi u ya kani ka Behdieñkhlam ka Raij Chyrmang wei dap u dei kmen wow yoo wa ki khon ka Niamtre ye ki wow pyndep ya kani ka niam ya kawa da yah da ki longchwa manchwa.
Da ong u wa ha ki ar snem wa dadep ymyoh u ya emlang kamni tangwa ha kani ka kynti da yoh u yachem kamni iwa pynyoo wa u Blai emlang u chirup wa i.
Neiliang u Lahkmen Rymbui hawa e i klam da ong u wa hawa yoh u pyndep ya ka niam ka rukom wanrah ko yei kmen ym du ya ka chnong ka thaw tangwa pynkmen ko leh ya ki paidbah wa wan sakhi ya ka.
Da ngait skem u leh wa lyngba kani ka lehniam daw yoh yei kyrkhu kyrdoh na u Trekirot wow e u yei chait i tram i ku ha i yoh i kot wei wow em i yatoh yumut ha yung ha sem, ha chnong ha thaw, wow em i mynsien yamaap kylliang khnang wa ka mynried u man ko kawa tympang.
Heijooh i por ha kani ka sngi u Lahkmen da pynbna u leh wow e yarap ya ka Seiñraij Chyrmang hadooh T. 10 lak wow ye u chna ya i yung katkam wa angnood ka Seiñraij Chyrmang.
Hadien wa noh ya ki Rong ki rot da pyndep leh ya ka Yadaw Charoh neitæ won da pyndep ya ka Kñia Biadem.
Ha kani ka sngi hanla joor u slap ka la’ær, ki paidbah da tooid ki cha kani ka thaw wow chimbynta wei wow sakhi ya kani ka Behdieñkhlam.
