Jowai: Ka Sohkymphor kawa man kawi na ki chnong wa haap hapoh ka Raij, Muthlong, Elaka Shanpung ynne ka sngi da pynman ko ya ka Behdieñkhlam yong ka.
U Marlister Lyngdoh, uwa man kam u President ka Seiñraij Sohkymphor da ong u wa nachwa jooh rah ki ya ki rot cha Muthlong tangwa hadien wa mih yaphær yumut ki waheh da dam ki u rah ya ki rot cha Muthlong wei da pynkhreh wei da rah ki ya ki rot pyn ha chnong.
Da ong u leh wa kani ka Behdieñkhlam man ko kam wow ya lehkmen ki khon ka Seiñraij.
Hei yatoh won wa i rah biang ya ki rong cha Muthlong, neiliang u Marlister da ong u wa neiliang kiwa boon hi da ong ki wa emkaam wow pynneh u rah ya ki rot pyn hapoh ka Sohkymphor hi.
Kani ka Behdieñkhlam da sdang ko nadooh ka 3 tarik wei ynne ka sngi khaddooh dang step da pyndep ya ka Pam Pyrdong namo ka ka Pam Tyr’ut.
Wei heipor sngi won da rah ya ki rot cha Madan Chongngiah heiwa u DC ka East Jaiñtia u MS Lhuid da man u kam u kongsan katwa u MDC ka JHADC u S. Tang won da man u kam u symbood kongsan.
Heipor wa wanrah ya ki rot da hiar joor u slap wa ka la-ær tangwa hanla kattæ leh ki khon ka Seiñraij Sohkymphor chynrang wa kynthai da wanrah ki ya ki rot wei hei ood ki bom ki bhuri da yachaad ki heipor wa wanrah ya ki rot.
Ynne ka sngi da wanrah hadooh 12 tylli ki rong næ ki rot kiwa da wanrah na ki dong wa ki kyntoit waphær waphær kam na Pdeiñ Loom, Yurim Khliehchnong, Madan Sohbrob, Loompyrdi, wa kiwi kiwi.
U Lhuid hei klam yong oo kam u kongsan ynne ka sngi da ekhublei u ya waroh wei da kular u leh wow thooh ki laad ki luti wow pynphooh choohchooh ya kani ka Behdieñkhlam.
Discussion about this post