Jowai: Kam wa da yoh u yoo u sakhi wa ka Behdieñkhlam hapoh ka Raij Jowai da sdang ko ynnin ka Pynsiñ 11 tarik heiwa ki khon ka Niamtre da pyndep ki ya ki sarin ka niam jiar jiar ki yung ki sem kamjooh ka Khon Raij da pyndep ki yei rong i rah ya ka Symbood Khnong na khloo na kjam.
Ynne won heipor step da sakhi wa ki chakri Niam ka Raij nadooh u Dolloi, Pator, Langdoh, Sangot, wasan waheh wa ki kñi na ki kur waphær waphær da hiar ki cha Syiem Aitnar neibynta wow pyndep yei e ngooh e dem wei pynkyntang yei man yong ka nadooh kani ka sngi heiwa ka adong niam da ong ko wa nadooh kani ka kynti ymhoi de u em kiwon kiwon kiwa tamkti tamkjat cheidoh i pran yong ka Syiem Aitnar kat hadooh wow poi ka sngi Muchai wow yoohkjat nyngkong hei doh i pran yong ka da ki chakri niam.
Ya ka lehniam ha kani ka step da pyndep da u Sangot Paswet deilang wei synraan u Sangot Pakyntein wow Sangot Pasubon heiwa katkam ki sakhi sabut yong kani ka lehniam da ong wa man iwa miat wabha heiwa ki chakri niam kamjooh ki khon ka Raij yooluti ki wow yoh yei kyrkhu khyrdoh.
Hadien kani ka kñia ki khon ka Raij da mih ki wow li thooh ya ki Dieñkhlam katwa ki Khonraij won da mih ki wow li thooh ya ka Khnong Blai. Kani ka sngi man ko leh ka sngi wow yachemlang kawa pynyoo yei ya maya kylliang heiwa chwa wow pteiñ ya ka dieñkhlam ki khynnah waheh na jar jiar ki kur ya baam ja lang ki chirup khlem wyrchaw na u heh na u khian.
Manda dep baam ja sngi wei da pyndep u pteiñ ya ki Dieñkhlam da rah ya ki cha Iawmusiang da jar jiar ki chnong wa kynthup ya ka Tpeppale, Dulong, Panaliar, Loomiongkjam, Iongpiah, Loomkyrwiang katwa ka Chilliangraij (Khonraij) da rah ki ya ka Khnong Blai.
Hadien wa da poi lut ki Dieñkhlam ha Iawmusiang ki Khonraij da lai thooh ki ya ka Khnong Blai ya kawa da pynchong chipor ha Poh Sawiar (hajan ka yung krehkaam u DC, WJH) wei da rah ya ka cha Loom Sooiung (Hajan Marian Hill HSS).
Hadien ini ki Kmai Raij da liwan ki chirup na kawi ka luti cha ki dong ki chnat yong ki.
Photos Contributed by: Soolangki-D. Laloo
Discussion about this post