Hawa jit wa jaw poi CHC ka manbei yow kha khon | Ym em kha hapoh kari pyntikna ko

I pynman ya ka Public Hearing ka Shree Cement Ltd ha ka 31 tarik u July da wanrah i yei thut hei chongsuk heiwa da yoh u sakhi ya i chah sympat lathi, i kawang Tear Gas, i dat moo kamjooh i chah tih u sarok ha Tongseng, Nongkhlieh iwa da ktah yei lai i wan yong kiwa boon wei khamtam kawi ka manbei wa pun-khon wa da maad yeiwa jit wa jaw wow poi cha thaw sumaar wow kha yei khon.

Kani ka manbei toh ka Riniwanki Sukhlain kawa 35 snem na Shnongrim heiwa da pyrchang wow yah ya ka cha thaw sumaar nadooh wa sooh khon ko hei step hadien wa wan pait ka ANM kawa da ong wa hap wow lai yah ka cha thaw sumaar.

Mut ki u mih na chnong wow lai cha thaw sumaar heipor 6:00 waje i step kat u yoh u mih 8:30 haroh tangwa nei em ki damok wa yang tymbud luti wa dat moo ya ki kari wei i tih ya u sarok, neiliang uwa yah Ambulance leh ym nood u wow lai kamjooh leh kiwi ki kari ki bru samen leh da tieñ ki u lai neibhah wym lait de ka luti.

Hadien wa pyrchang wei kyrpaad boonsien wei klam ki waheh chnong kamjooh ki pulit da ye wow kit ya ka da ka kari kat hadooh ha Tongseng (wa chah tih sarok) heiwa heini da hap yang kamwa 45 minit hadooh wa wan sa kawi ka kari na Lelad yow kit ya kani ka manbei wa punkhon cha ka thaw sumaar kawa da yang chiliang iwa chah tih u sarok.

Related posts

Da ki pulit na Garo Hills wanrah ka sorkar yow kem ya ki dkhot ka JNC | Chah sympat lathi leh

August 1, 2026

Chah kem 4 ngut ki dkhot ka HNYF heiyatoh wa iwa jia ya u Lawyer

August 1, 2026

Kani ka manbei dapoi ko ha Sutnga CHC heipor kamwa 10:15 wei du hapoh chi kynta da yoh ko yei khon kynthai.

Hawa yaklam wa kani ka manbei kawa dang em ha Sutnga CHC da ong ko wa nachwa i lai i wan man iwa suk tangwa da hap maad ki yeiwa eh wa khor du neibynta ka Public Hearing ka Shree Cement Ltd.

Da beiñ ko leh ya ki pulit wa hajrong wa sap ki ya ki Uniform yow pyndep yei kaamram yong ki wow pynneh yei chongsuk dang yoh ki bru u tih ya u sarok wei weileh wa hap wow paan bor na ki pulit wow lai cha thaw sumaar wow kha yei khon. 

“Weileh sang wot kiwa yah Ambulance leh tieñ ki wow lai luti toh hi mo nei em kiwa yang cha luti syngkieñ,” da kylli ka manbei deiwa pynrap wa ini i khang pynman sakhiat i mo ya ka Public Hearing kawa jop?

Chooh chooh da ong ko wa i por wa hap yang wow poi ko deiwa suk cha thaw sumaar da man i por wa slem neibhah ka chi minit leh da man ko lakam chi kynta wa da pynchitom ya ka.