Hei 1st Position yoh ka Avila Kathrene P Lyngdoh ha ka SSLC 2025 kawa lai skur ha North Liberty

Ka Avila Kathrene P Lyngdoh da wanrah burom ko ya Ri-loom Jaiñtia waroh kawi deiwa yoh nyngong namo ka 1^st Position ha ka Result ka Secondary School Leaving Certificate (SSLC) Examination 2025 wa da pynbna da ka MBOSE ynne ka sngi.

Ka Avila kawa lai skur ha North Liberty Higher Secondary School, Jowai da yoh Distinction ko ha ki 6 tylli ki Subject deiwa yoh 582 Marks, wei man ko ka khon u Paul Synnah wa ka Markamki Lyngdoh.

Hawa yaklam wa kiwa thoh khubor da e khublei ko ya u Blai deilang ka bei wa u pa ko kiwa da yarap ka hei wow khreh kot kamjooh ya u Principal wa kiwa sikai ka skur kiwa da e yarap ya ka ha iwon iwon i por khlem da kyntait.

Da ong ko wa hawa yoo ko ya ka Result da khyrngiat ko neibhah wym em yooluti ko deiwa pynrap wa da khreh kot bha ko wot heipor wa baam leh wei da pyrkhat ko wa u Blai daw yarap u ya ka yeini wa kreh chitom ko.

Related posts

Daw pynlait ya ki Form Class XI (Commerce) ka Government Boys’ HSS, Jowai

May 5, 2025

Mih pyrtuid ka North Liberty wa Govt. Girls’ Jowai ha ka thup Top 10 ka HSSLC 2025

May 5, 2025

Wei hawa yoo yei pyrtuid ko wa yoh nyngkong ko da kmen ko wym em sepai i kreh chitom waroh chi snem. Wei da yooluti ko wa neini chakhmat lada jied ko ya kawon kawon ka luti leh daw ye ko wow kreh chitom yow lehbha.

Da pynchlur ko leh ya kiwi wow kreh chitom lada haap la oor leh tangwa emkaam wow sdang donhi deiwa kreh nadooh na mynsien.

Da ong ko leh wa kwah ko wow jied u lai puræ Science ha ka Class XI.

Neiliang u pa ko da pynsñiaw u yei sñiawngooh ya ka skur nadooh u Principal wa kiwa sikai deilang ya ka kurim kawa da em bait wa ka khon hawa oo wa hap lai u cha kiwa boon ki thaw katkam wa yah i kaam i jaam.

Da ong u ya kiwi ki manbei manpa wym toh u pynbor ya ki khon ki wow khreh kot tangwa wow kreh kot ki deiwa kmen kamwa man kiwa lai khwe cha ka wah Myntdu kiwa lai dei miet wei sngi tangwa da leh ki yeini neidaw wa maya ki yei lai khwe.

Neiliang u Principal ka skur, u Richard Uriah, da ong u wa i yoh 1^st Position hapoh ka jylla toh i angnood yong kiwon kiwon ki Principal ka skur wei ini ya oo da yoh u hadien 25 snem wa man kam u Principal. Da khana u wa ha uni u snem da em 122 ngut kiwa yaleh SSLC na ka skur wei na kini da em 20 ngut kiwa lai skur hapoh ka Sports Promotion Scholarship ka North Liberty wei kani man ko ya kitu ki khynnah wa em i sap wa kyrpang ha ki yalehke Sports wei da wan ki na ki chnong wa jngai na Jowai wei em kiwa tang u puræ u thoh dei miat ym tip ki heipor wan ki cha kani ka skur.

Wei na kini ki 20 ngut 19 ngut da Pass ki wei uwi na ki da yoh u le tylli ki Distinction. Na waroh 122 ngut kiwa yaleh da em 99 ngut kiwa yoh 1^st Division wa 22 ngut ha ka 2^nd Division wei ym em wa yoh 3^rd Division.

Da em leh 34 ngut kiwa yoh Distinction ha ka English, 42 ngut ha ka Mathematics, 60 ngut ha ka Science & Technology, 22 ngut ha ka Social Science, 33 ngut ha ka Khasi, 5 ngut ha ka Additional English, 66 ngut ha ka Health Education wa uwi ha ka Computer Science.