Ka Eulogemene Rilin L Suting kawa puræ ha KJP Synod Mihngi Higher Secondary School Jowai da yoh wow psiah hapoh ka Top-20 deiwa yoh 3rd Position ha ka Result SSLC 2025 wa da pynbna da ka MBOSE ynne ka sngi, wei hawa e mynsien ya ki para khynnah skur, da ong ko wa najrong i minot puræ kot, toh wow man leh kiwa tip u kheiñkor yei por wei wym toh u pynsepai yei stat wa da e u Blai.
Wei chwa wow leh iwon iwon i kaam kamjooh chwa wow khreh kot nyngkong hi toh wow kyruiñ cha u Blai.
“Kamwa ong ka ktien u Blai wa em i por ya iyi iyi waroh, kamtæ hawa leh kiyi kiyi leh toh u man kiwa tip wow syndong yei por nadooh i por khreh kot, i por lehke, i por wow pynemkaam Mobile Phone wa kiwi de deiwa sñiawthooh ya jar jiar i bor,” da ong ka Eulogemene Rilin L Suting.
Ka Eulogemene Rilin L Suting toh ka khon ka Rimedian Suting wa u Prolin Langshiang kiwa chong wa sah ha Chutwakhu Tredieñlin, Jowai.
Hawa yaklam wa u Vice Principal ka KJP Synod Mihngi Higher Secondary School, u Wanmi Passah, da pynsñiaw u yei kmen yei wanrah naam ka Eulogemene Rilin L Suting ya ka skur, neibhah wa man ko ka khynnah wa waroh kiwa sikai da yooluti ki wow poi cha kani ka kyrdan.
Neiliang u pa yong ka won ong u, kam uwa sikai yong ka skur Nongbareh Lyntiar Secondary School kawa haap hapoh Amlarem Sub-Division, katwon dap u dei kmen wa khroo wa najrong wa Pass lut ki khynnah haka skur wa hikai u, sa ka khon yong oo leh poi ko chakhmat kamni.
Ka bei yong kani ka khynnah da pynsñiaw ko yei sñiawngooh nyngkong ya u Blai, deiwa ong ko wa iwa yoh ka khon ko da pynkmen da iwa khroo ya ka wei ini toh lyngba i kreh chitom ka khon deiwa emlang chirup u Blai, kamjooh i embyntalang kiwa boon wow booh hei duwai.
Discussion about this post