Ka Weimaya Nongtdu Lakiang kawa lai puræ ha North Liberty Higher Secondary School, Jowai da wanrah burom ko ya ka skur deiwa yoh ha ka 8th Position ha ka SSLC Exam 2026 heiwa ya ka Result da pynbna ynne ka sngi da ka MBOSE.
Ka Weimaya da yoh ko 6 tylli ki Distinction wa 568 ki Total Marks heiwa ha ka Mathematics wa Health & Physical Education da yoh ko 100/100.
Hawa yoh u yaklam wa ka Weimaya, nyngkong da e khublei ko ya u Blai uwa da e sakhiat u yeiwa kwah ko. Da e khublei ko leh ya u Principal ka skur uwa da pynchlur bait kamjooh kiwa sikai kiwa da e lut da theh lut yei stat yong ki ha ki khynnah. Da e khublei ko leh ya ka bei u pa ko kiwa da emlang bait chirup wa ka.
Da ong ko leh wa da yooluti hi ko wow poi chakhmat tangwa ym nood ware ko wow ong hadooh katwon ya sñiawsih pathan.
Heiyatoh won wa i pynkhreh ko ya ka Exam, da ong ko wa da khreh kot ko katwa yoh i por wei katwa ye ko deiwa khlem ieh ya kiwi ki kaam kiwa kwah ko. Da ban joor ko wa iwa emkaam toh wow khreh kot waroh chi snem.
Da ong ko leh wa ka toh kawa ka-it bha u yalehbol kam u pa ko, wei da chimbynta ko leh ha ki yalehke Subroto Cup ka skur heiwa da mihkhmat leh ya ka West Jaiñtia Hills ha Shillong iwa da pynkmen mynsien ya ka wei sñiawsuk ko leh wow thaiñ heipor wa chong ngiah ko.
Da khana ko wa na waroh ki Subject, da chem chitom ko ha ka Social Science neibhah wa heh ko wei em ko boon jait nadooh ka Economics, History, Geography wa Civics najrong wa boon lynnong ka kot.
Katkam wa man kattæ da ong ko wa daw lai puræ ko da ka Science heiwa daw lai skur noh ko cha Chennai deiwa ong wym mylliñ de ko ya ka skur ko kawa da pynbiang ya ka yurim neibynta yong ka.
Discussion about this post