Jowai: Wow e mynsien chooh chooh ya ki khynah puræ yong ka Ri-Loom Jaiñtia kiwa poi chakhmat ha ki Exam yong ki ha i kyrdan puræ Secondary School Leaving Certificate (SSLC) wa ka Higher Secondary School Leaving Certificate (HSSLC), chim ka Akhil Bharatiya Vidyarthi Parishad (ABVP) wow pynkup burom ya ki daka Award kyrpang watip pyrtuid kam “U Kiang Nangbah Best Students Award 2017”.
Ya kani ka punkup burom da pynman ynne ka 25 tarik ha Tpep-pale heiwa ya ka yalang da pyllai da ka Nisha Pala kawa man ka Joint Secretary ka ABVP Jaiñtia Hills katwa u Sanbor Biam uwa man leh kam u Secretary ka seiñ da e u ya ki kyntien pdiang burom yeiwa da pynbood ya i klam na ka State General Secretary ka ABVP-Meghalaya.
Ha kani ka sngi u Incharge ka Jowai Traffic Police u DH Pde da man u kam u kongsan katwa u Principal ka North Liberty HSS u Richard Uriah da man u kam u symbood kongsan.
Kam u symbood kongsan u Uriah da ong u wa i pynkup burom hanlada man i iwa heh namo iwa khian ymphær i neibhah wa pynyoo wa yoh hi ki u maad ya u soh wa thiang nei kreh chitom yong ki heiwa da kyntu u leh ya waroh ki khynnah wow pteiñ ki u minot wei wow tia ki chaphrang.
U kongsan nawon u DH Pde hei klam da ong u wa ha kini ki sngi chirup wa i puræ puthi emkaam leh wow yada ya ka Bei Rymaw kawa e ya i i mynsien wa man ka sngi. Da kyntu u leh ya waroh wow man ki kiwa minot wei wow poi ki cha ka thong yong ki.
Ynne ka sngi da pynkup burom hadooh 30 ngut ki khynnah wa wan na kylleiñ ka ri-loom Jaiñtia.
Hadien ini da yoh ya ki kyntien khublei na u Refil Sari uwa man kam u State Working Member ka ABVP-Meghalaya.
Discussion about this post