theme-sticky-logo-alt
theme-logo-alt

Hei sien nyngkong da pynman ya ka Gymnastics ha ka Meghalaya Games

Ha ki snem wa nachwa, ka yalehke Gymnastics toh kawa dang yoh thiah ha Meghalaya tangwa dei kreh chitom ki kattu katni wa maya ya kani ka jait yalehke kamjooh kiwa yalehke, da pynim biang ya ka Meghalaya Gymnastics Association (MGA) ha u 2018.

Kamtæ ha kani ka Meghalaya Games 2022 hei sien nyngkong da booh lang ya ka Gymnastics kam kawi na ki jait yakob.

Ka MGA deiwa chem ya ki khynnah wa ka-it ya ka Gymnastic kiwa da thooh yei sikai Online wei da chimbynta ya ki yalehke pyn ha ki yung yong ki hi neidaw wym yoh thaw ki wow yalehke.

Kamtæ ka Association da wanrah ko leh ya u Coach wa pawnaam na Manipur, u L Baleshwor Singh uwa da pynlut por da ki bnai ha Shillong deiwa kyrchaan poisa ka MGA wow e sikai ya ki khynnah.

Kamtæ da mih 24 ngut ki khynnah kynthai kiwa da chimbynta ha ki 4 tylli ki jait yalehke kam ka Vaulting, Balance Beam wa kiwi de ha ka 4th Meghalaya Games 2022 ha SAI Indoor Training Centre heiwa kawa dang khian rta dooh wa chimbynta toh kawa dang 6 snem.

Ha ki yakob wa da sdang ynne ka sngi, ka Wandalang Magdalene Malngiang da yoh ko ya ka takma ksiar ha ka Category 4 (neibynta ki kynthai wa da heh rta dooh) ha ka Floor Exercise. Ka Bakmenhun Shangpliang da yoh nyngkong ko ha ka Category 3, ka Wansaphi Bernadette Malngiang ha ka Category 2 waka Ruffina Malngiang haka Category 1.

Ha ka Vaulting, ka Wandalang Magdalene Malngiang toh kawa samen wa chimbynta ha ka Category 4 yow yoh takma ksiar deiwa yoh 8 Point ha ka 10 Point. Ka Josephine Warjri da yoh ko nyngkong ko ha ka Category 3 wa ka Sa-I-Bakor Tariang haka Category 2.

Ha ka Balance Beam, ka Ruffina Malngiang da yoh takma ksiar ko ha ka Category 1, ka Sa-i-bakor Tariang ha Category 2, ka Josephine Warjri ha Category 3 waka Wandalang Magdalene haka Category 4. Ya ki takma daw e mynstep ka sngi. 

Ha ka Basketball wa sdang leh ynne ka sngi ha NEIGRIHMS Indoor Stadium, ka West Khasi Hills da jop ko ha ki yalehke ki kynthai da 73-17 ya ka South Garo Hills. Ka Ri-Bhoi da jop ko ya ka West Garo Hills 22-05. Ka East Khasi Hills da jop ko ya ka South West Khasi Hills da 50-07.

Ha ki chynrang, ka Ri-Bhoi da jop ko da 64-35 ya ka North Garo Hills, katwa ka East Jaintia Hills da jop ko da 59-29 ya ka South West Garo Hills.

Ha ka Wushu wa da pynman ha Madanrting, u Pyniohnam Marboh ka East Khasi Hills da jop u ya u Habandajop Kharsahnoh ka Eastern West Khasi Hills ha ka Sub-Junior Boys’ Below 28kg. Ha ka Below 24kg Sub-Junior Boys’ Category, u Sammarbiang Kharsahnoh ka EKH da jop u ya u Nangkhraw Kharsyiemiong ka EWKH yow yoh ya ka takma ksiar.

Ka yalang wai pyrda ya ka Meghalaya Games 2022 toh kawa daw pynman mynstep ka 3 tarik heipor 10:00 waje i step ha SSA Stadium, First Ground, Polo.

Share this:
Previous

Rah ka Shillong Cricket Association (B) ya ka Inter District U-19 Boys Cricket Tournament

Next

Ym biang thaw sum, thaw thiah thaw dem kiwa chimbynta haka Meghalaya Games 2022