Ka Seng Khasi Seiñ Raij Delhi da pynman ko ya ka Chaad Sukra kawa nyngkong dooh ha nongbah Delhi haka 16 tarik uni u Naisan deiwa sakhilang u Sanjay Goyal, RC ka Meghalaya House Delhi kam u kongsan deiwa emlang kiwi de kiwa chah khut sñiawbha wa ki waheh wasan kiwa da kyrchaan ya kani ka yalang paidbah.
Ka seiñ da e khublei kyrpang ko ya u Wailadmiki Shylla wa u Prestone Tynsong deilang ka My Home India kiwa da e yarap sñiawbha yow pynman ya kani ka Chaad Sukra kawa jop.
Ya kani ka Chaad Sukra wa nyngkong dooh ha Delhi da wan wow embynta da kamwa 100 ngut ki paaid u Ynñiawtrep wa ki paralok na kiwi ki jylla.
Da wan wow chimbynta da 8 ngut kiwa chaad heiwa da yoh ya ka Chaad Pliang, ki Chaad Rwai katkam ka riti dustur ki Pnar, wei neiliang ka Seng Khasi Seiñ Raij dap ko dei sñiawkmen wei da kyrmen leh wow ye u pynman chooh chooh ya kam kini ki laad wow pynyoo pyrthai ya ka dustur riti yong ka jaitbru, i yatylli wa i sñiaw sarong kiwa chong wa sah ha Delhi.
Da e khublei ya waroh ki Executive Member yong ka Seng Khasi Seiñ Raij Delhi kiwa da kreh chitom wei yatylli yow pynman ya kani ka tamasa kawa phooh wa phieñ kamjooh ya waroh kiwa da wan wow sakhilang wei kyrchaan ya kani ka Chaad Sukra.
“Deiwa yatylli, deiwa yaichah wei dei mynsien ya krehlang, ka riti dustur wa ka Niamtre yong i daw neh wei phooh paidbah ko ha kylleiñ ki thaw,” pynkut ka khubor na u General Secretary ka Seng Khasi Seiñ Raij Delhi, u Marvel Sungoh.
Discussion about this post