Ka sorkar India da chna ko da ka National High Level Task Force neibynta u paitbniah wei wow pyntyllung ya ki kaam pynroi ha ki jylla ha North East.
Ya kani ka luti da chim ha ka yalang wa 73 yong ka North Eastern Council (NEC) ha Shillong ynne ka sngi kawa pynlai da u Home Minister ka ri, u Amit Shah.
Hawa klam hadien wa wai ka yalang, u Montri Rangbah ka jylla, u Conrad K Sangma da ong u wa kani ka luti toh kawa nyngkong wa ka sorkar India daw chna ko kamni neibynta u khynngiat smat ya ki kaam pynroi ha kani ka thaaiñ.
Heijjoor i por da pyntip u wa kiwa yahkhmat ka Khasi Authors’ Society (KAS) hapoh i yahkhmat u President, u Dr. DRL Nonglait, da yachem ki wa u Home Minister ka ri, u Amit Shah yow dawa pynpsiah noh ya ka ktien Khasi ha ka 8th Schedule wei kamjooh leh da wan kiwa na ka Achik Literary Society neibynta ka ktien Garo.
Kiwa yahkhmat ka Balang Christan leh da yachem ki wa u Amit Shah hajrong ka Foreign Contribution Regulation Act (FCRA) heiwa u Amit Shah da kular u wow bichaar bniah yeini.
Neiliang ka KSU leh da yachem ko wa u Amit Shah yow dawa e noh ya ka ILP neibynta ka Meghalaya.
Discussion about this post