Ka Department of School Education and Literacy, Ministry of Education ka sorkar India da pynlait ko ya ka Performance Grading Index (PGI) neibynta ki jylla ka ri neibynta u snem 2020-21, kawa bichaar ya ki kaam puræ puthi deiwa yabhah ya ki jylla ha ki 10 kyrdan kitæ ka Level-I, Level-II dep te wan sa ki Grade I+, Grade I, Grade II, Grade III, Grade IV, Grade V, Grade VI wa Grade VIII.
Waroh ki skur hapoh ka ri da em ki 14.9 lak tylli, kiwa sikai 95 lak ngut wa 26.5 klur ngut ki khynnah wa lai skur. Wei neiliang ka DoSE&L da sdang ko wow pynmih ya kani ka PGI Report nadooh u snem 2017-18, 2018-19, 2019-20 wa kawa katni kawa 2020-21.
Hapoh kani ka PGI da booh 1000 Point kiwa da kheiñ da 70 tylli ki jait kaam kiwa da yabhah won ha ki ar bynta kitæ ka Outcomes wa Governance Management (GM). Ya kini da yabhah chooh chooh sa ha ki 5 bynta kitæ ka Learning Outcomes (LO), Access (A), Infrastructure& Facilities (IF), Equity (E) wa Governance Process (GP).
Yow yoh u em hapoh ka Level I, emkaam wow yoh palat 950 Point na ki 1000 Point katwa kiwa cha tre dooh toh ka Grade VII kiwa yoh hapoh 551 Point.
Hapoh ka Level I ym em wa yoh tangwa ha ka Level II da em 7 tylli ki jylla kiwa yoh kitæ ka Kerala (928 Point), Punjab (928 Point), Maharashtra (928 Point), Chandigarh (927 Point), Gujarat (903 Point), Rajasthan (903 Point) wa ka Andhra Pradesh (902 Point) heiwa ha u 2017-18 ym em wa psiah ha kani ka kyrdan katwa ha u 2019-20 da em soo tylli heiwa ha u 2020-21 da psiah thymme ka Gujarat, Rajasthan wa Andhra Pradesh.
Ka UT wa dang thymme ka Ladakh (844 Point) da ku ko naka Grade V cha ka Grade I ha kani ka kynti deiwa yoh sa 299 Point na iwa yoh ko ha u 2019-20 iwa man leh iwa ku dooh na waroh ha ka chi snem.
Ka jylla wa em cha tre dooh toh ka Arunachal Pradesh kawa man leh du ka wa em ha ka Grade IV deiwa yoh 669 Point wei ha ka Grade III da em 4 tylli ki jylla heiwa na tre dooh toh ka Meghalaya kawa yoh 716 Point, pynbood sa ka Uttarakhand kawa yoh 719 Point, ka Nagaland 728 Point wa ka Manipur 741 Point.
Ka Mizoram (765 Point) deilang waka Sikkim (751 Point) toh kiwa em ha ka Grade II katwa ka Assam (848 Point) waka Tripura (834 Point) toh kiwa em hapoh ka Grade I.
Kiwa boon ki jylla toh kiwa em ha ka Grade I+ kawa tip leh kam ka Level III wei kini toh ka Andaman & Nicobar Islands, ka Dadra Nagar Haveli & Daman Diu, ka Delhi, Haryana, Himachal Pradesh, Karnataka, Lakshadweep, Odisha, Puducherry, Tamil Nadu, Uttar Pradesh waka West Bengal.
