Ka South West Khasi Hills da yoh ki yei naam jop na ki District ha ka Meghalaya State Archery Championship 2026 deiwa yoh 25 tylli ki Medal hadien le sngi kani ka yakob siat khnam kawa da pynkut ynne.
Da em palat 200 ngut kiwa siat khnam na waroh 12 tylli ki District kiwa da chimbynta wei ya kani ka yakob da pynman da ka Archery Association of Meghalaya ha Sports Authority of India Centre wa em ha NEHU Campus, Shillong.
Ka SWKH da tam ko ha ka sngi wa ar hadien wa pyndep ya ka Indian Round wei da neh ki hei nyngkong hadien wa pyndep ya ka yasiat da ki ryntieh Compound wa Recurve.
Ynne da yoh ki 12 tylli ki Medal, wei da yoh nyngkong ki deiwa yoh 8 tylli ki Gold, 10 tylli ki Silver wa 7 tylli ki Bronze Medal.
Ka East Khasi Hills da yoh ko yei wa ar katwa ka West Khasi Hills da yoh ko hei wa le.
Ya kani ka sngi pynkut da wan wow sakhi da u Montri ka chnat Sports and Youth Affairs, u Wailadmiki Shylla.
U Montri da pynlut por u hadooh le kynta yow pait yeiwa yasiat khnam wei da yaroh u leh yei sap ki khynnah wa yasiat.
Hawa e yei klam da pynkynmoo u leh wa ha ka 1st Khelo India Tribal Games kawa da pynman ha uni u snem, ka Meghalaya da yoh ko hei wa 13 wei da booh thong wow poi cha ka Top 5 ha u snem wow wan.
Kiwa yasiat khnam ka Meghalaya ha uni u snem da yoh ki ar tylli ki Gold Medal wa kawi ka Bronze Medal ha ka Archery wei da man ko leh wa du ha kani wa yoh Gold Medal ka Meghalaya.
Discussion about this post