Jowai: U Comingone Ymbon u Montri ka tnat bordiñ, C&RD Block wa kiwi, ynne ka sngi da chimkti u ya bynta kam u kongsan wow pynhap pyrda yaka Silver Jubilee ka Jaiñtia Eastern College ha Khliehriat, hei thaw u Montri Rangbah ka jylla u Dr. Mukul Sangma uwa da pynkhreh wow wan da ka Helicopter tangwa neidaw wa pynthut ka Rymaw da dam u wan.
U C. Ymbon hei klam yong oo da yaroh u ya kiwa sdang ya kani ka College hadooh wa poi ko cha uni u moomer wei da yooluti u wa kani ka College daw ku chooh chooh ko neini cha khmat wow e yei stat i tip, wei da kyntu ya kiwa lai puræ wow kreh chitom ki wym hoi u pynsepai yeiwa pynbiang ki bei ki pa yong ki wow kyrchaan ya ki u lai puræ ki.
U MP ka Lok Sabha u Vincent Pala da ong u wa na ki 35,500 tylli ki College hapoh ka ri India 98% toh yong ki bru samen wei kawi na ki toh ka Jaiñtia Eastern College katwa 2% toh yong ka sorkar. Da yaroh u ya kini ki College wa pynlai da ki bru samen hapoh ka ri neibhah ki man ki kiwa biang bar ya kiwa pynlai da ka sorkar.
Da ong u leh wa emkaam wa ki khynroo khyllood u pynemkaam ki ya i por yong ki ha i por wa lai puræ ki wei ini i por toh i wow yah ya ki cha ka thong yong ki.
Katkam ka parom wa tbian kani ka College, u Dr.P. Nongtdu, Principal ka College da pyntip u wa ya kani ka College da sdang ha u 1992 ha Moowakhu Dkhiah West da ki kattu katni ki bru hapoh i yah khmat u Rev. T. Dkhar na ka chnong Rymbai wa u Rev S.W. Lyngdoh na Mairang kiwa man ki Pastor ka Balang Presbyterian neibhah kiwa boon ym yoh laad ki u pteiñ ya ka puræ puthi cha baarjylla. Da khana u leh wa hadien wa da seiñ ya kani ka College ki tai wa kitkaam da khlaad ki wei da poi ka lyngkor cha u M. Bareh kam u President ka Governing Body wei ya u Principal da poi ha oo u Dr. P. Nongtdu.
Da tipmit leh wa ya ka Pre University Course wa da sdang ha u snem 1992 wei ha u snem 1993 da sdang ya ka Degree Course. Katni da em 600 ngut kiwa puræ wa 36 ngut kiwa sikai ha ki 8 tylli ki Department wei da em ko leh ya IGNOU Center wa kiwi.
Discussion about this post