Beiñ ki khynroo kiwa sah khappood wa ka Assam ya u Sniawbhalang Dhar

Shillong: Ki khynroo kiwa chong chnong khappood ka West Jaintia Hills District wa ka Assam ynne ka sngi da beiñ joor ki ya u MLA ka Nartiang u Sniawbhalang Dhar wa pynjoor u sa du i kular wow chna sarok.

Kiwa chong chnong ka chnong Lapangap wa em hajan Khanduli hajan u pood wa ka Assam da paan sarok khyndaw ki da boon snem.

Hawa yaklam wa kiwa thoh khubor ynne ka sngi, u Saikel Sumer da kam u wa heipor wa man Montri PWD u Dhar da kular u ya ki heipor wa yachem ki wa oo ha Shillong wa daw sdang u chna u ya uni u sarok nadooh u Naichiphaw tangwa hadien 4 snem ym em poi cheiwon cheiwon leh.

Da ong u wa ka chnong yong ki da chah ieh beiñ ko ha ka sorkar jylla wei heipor slap man ko kawa chitom ya ki u lai luti heiwa ka um da ku ko hadooh cha yingkeiñ wa pynyabi ya ka chnong yong ki wa kiwi.

“I kyntu i ya ka sorkar wow chna smat ya ka sarok wa ka ya yingkeiñ yow yarap ya ki paidbah” da ong u Sumer.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Sa uwi u khynroo u Augustan Timung da ong u wa heipor u MLA warim u Draison Kharshiing da em kawi ka sarok khyndaw tangwa ym em wa pynchna pynmiat ka da kiwa boon snem.

Da ong u leh wa da boon kiwa dooh yei mynsien neidaw wym biang sarok.

Da pyntip u leh wa ym em Sub-Centre wei ki paidbah hap lai ki 9 Km yow yoh thaw sumaar ki wa em ha Khanduli.

Chooh chooh da ong u wa da em kawi ka Dispensary wa da sdang da uwi u Doctor ha u snem 1972 tangwa ya kani leh da kyrriah cha Shangpung ya ki daw wym tip.

Da ong u leh wa ki kaam wa leh ka sorkar Assam pyrchah ya ki paidbah kani ka thaiñ ym jooh yoh yarap ya ki na ka sorkar Meghalaya.