U Montri Rangbah ka Tripura, u Biplab Kumar Deb ynne da pynbna u wa da ieh u ya ka chuki deiwa phah ya ka chithi cha u Lat ka jylla, u Satyadev Narayan Arya.
U Biplab uwa man leh u MLA ka BJP da ong u wa da kwah u wow kreh yow pynkhlan ya ka Party. Wei ini i ieh u ya ka chuki kam u Montri Rangbah toh 8 bnai chwa wow pynman Election biang hadien wa ka BJP da jop ko yow chna sorkar ha u snem 2018 hadien wa da synchaar ka Communist da boon boon snem.
Chwa wow ieh noh u wow man kam u Montri Rangbah, u Biplab da yachem u leh wa u Montri ki Kaam Pohyung ka ri, u Amit Shah wa u BJP President, u JP Nadda ha Delhi ynnin ka sngi heiwa da yaklam ki yei pynkhreh ya ka Election.
Yei daw wa da hiar chuki u Biplab ym em da khana tangwa da em i ya kynaad hapoh ka BJP heiwa da em kiwa da sñiaw wa u Biplab ym ye u wow yahkhmat ya ka Party yow jop biang ko sa chisien kamtæ da emkaam wow kylliang noh ya uwa yahkhmat.
Ka BJP da yooluti wow pynbna Montri Rangbah thymme ko da u Dr. Manik Saha heiwa da jied ya oo kam u Legislative Party Leader. U Manik toh u MP ka Rajya Sabha wa u State President ka BJP Tripura.
