theme-sticky-logo-alt
theme-logo-alt

Sdang ka e sikai wa nyngkong hapoh ka Skill Meghalaya ha West Jaiñtia ha Ialong

Ka sorkar jylla lyngba ka Meghalaya State Skill Development Society (MSSDS) kawa haap hapoh ka Labour Department da sdang ko yei e sikai hapoh ka Skill Meghalaya wei ka thong toh wa ha ki san snem yow e sikai hadooh chi lak ngut ki khynroo khyllood ha ka sap kreh ki waphær waphær. Ha kani ka snem ka sorkar da em ko i thmu wow e sikai hadooh 20,000 ngut hapoh ka jylla.  

Ynne ka sngi ka Society of Urban and Rural Empowerment (SURE) kawa da tipmit da ka MSSDS kam kawi na kiwa e sikai namo ka Skill Training Provider (STP) hapoh ka jylla da sdang ki ya ka e sikai ya ka rukom rep deiwa rep lang ya kiwa boon ki jait kawa tip kam ka Integrated Farming haka chnong Ialong.

Kani da man ko ka sien wa nyngkong wa ka Skill Meghalaya da pynman ko ya ka e sikai hapoh ka West Jañtia Hills District.

Hawa e yei klam maitphang yong kani ka e sikai, u Dr. H.H. Mohrmen da khana u wa ki kaam wa ka seiñ da kreh ko toh kam ka FOCUS, ka Link Workers Scheme wa kiwi kiwi. Da ong u leh wa hawa yatoh waka Integrated Farming, ka seiñ da pynman chwa ko ya kiwa boon kam kini ki e sikai nachwa kawa da yarap poisa daka Asian Development Bank ha ki le tylli ki chnong kitæ ha Wahiajer, ka Ksehrynchang wa Moosakhia.

Hawa klam pdiang sñiawbha ya kiwa chimbynta waroh ha kano ka e sikai, u T Ram Phawa uwa man leh kam u Waheh Chnong yong ka Ialong da yaroh u ya ka SURE wa de ye ko wow wanrah ya kam kani ka e sikai khnang wa kiwa chong chnong u ye ki wow pynheh wei pynjanai ya ki krehkaam yong ki. Da ban joor u leh ya ki Self Help Group (SHG), ki Village Organisation (VO) wa ki Producer Groups (PG) wow kreh ki khnang yow ye ki u wai biang ya ka yaw rood sarok (Lay Bye Market) kawa em harood ka sarokbah haka chnong Ialong. Da kyntu u leh ya kiwa chah sikai wym toh u pep ki ya kani ka e sikai.   

Ha kani ka yalang da yoh leh i klam na u Lambor Suchen uwa man u Skill Development Officer naka yung krehkaam ka Meghalaya State Skill Development Society(MSSDS) uwa da khana ya kiwa boon jait ki e sikai kiwa da pynkrehkaam da ka MSSDC lyngba ka SURE.

Da ong u leh wa neidaw ka chnong Ialong kawa em harood u sarokbah wei kawa man leh kam ka thaw uiñke suwari namo ka Tourist Spot, da kyntu u leh ya kiwa chah sikai wow chimkhia ki ya ka e sikai khnang wow ye ki u pynmih ya ki mar kiwa ye ki u dai ha kini ki thaw.

Ya ki kyntien e khublei da e da ka Sngi Dhar kawa man ka President yong ka VO yong ka chnong Ialong.

Share this:
Previous

Sdang ka JSU ya ka chnat wa tip kam ka Labang-Nongphyllut Circle

Next

Hiar chuki u Montri Rangbah ka Tripura