Shillong : U Chief Minister ka Nagaland ynne ka sngi da hiar chuki yow jied Chief Minister thymme uwa mynjur lang da waroh yow pynkut noh ya i yakhih hapoh ka jylla.
Ha ka chithi wa thoh u cha ki MLA wa synchaar ka ka Nagaland ka Naga People’s Front (NPF), u Zeliang da ong u wa i rai yong oo wow hiar chuki toh yow wanrah i sñiawthooh hapyrdi ki paaid wa yakhih wa pyrchah ya oo wa kiwa kyrchaan ya oo. Ini i yakhih da neh i la kamwa 2 bnai kattu.
U T.R. Zeliang da wanrah u i yakhih wa joor bha ha Nagaland heiwa ki chynrang da pyrchah joor ki yei pynman Election u cha ki Urban Local Bodies wa ya sariem wa ki Municipal wa ki Dorbar Chnong heiwa da booh kyrpang (Reservation) 33% ya ki kynthai yow emkti ki ha ka synchaar khadar. Da maham ki leh wow Boycott ya ka MLA Election wow pynman ha u snem 2018.
Da khut u leh da ka yalang wow pynman mynstep ka 20 tarik heipor 10 waje i step ha State Banquet Hall ha pyrdi ki MLA ka NPF wei daw pynbood won saka yalang wa ka Democratic Alliance of Nagaland (DAN) kawa kynthup ya 49 ngut ki MLA ka NPF, 4 ngut ki BJP wa 8 ngut ki Independent MLA.
Ynnin ka sngi won kamwa 50 ngut na ki 60 ngut ki MLA da soi pyrtuid ki wow pynman noh ya u CM warim ka Nagaland u Neiphui Rio uwa man katni kam u MP yow man noh u kam u Party Leader heithaw u Zeliang.
Discussion about this post