Hadien wa yap ka manbei wa i khon ha u bnai wa dadep, ynne ka sngi ka Chairperson ka Committee on Empowerment of Women, Meghalaya Legislative Assembly, ka Santa Mary Shylla da lai ko cha chnong Langtor, Eastern West Khasi Hills District.
Ini i lai toh wow pyntngen ya kiwa hayung kani ka manbei, ka Darisha Lyngdoh hadien wa chem ya i metyap yong ka wa i khonboo yong ka najan iwi i thaw tong-um ha Kynshi, Langtor ha ka 2 Wisu uni u snem wei da wiar ko nadooh ka 1 Wisu.
Ya ka Santa da synraan da ki dkhot ka Committee heiwa da lai ki leh cha i thaw wa chem ya ki metyap wei da lai won ki cha Mairang Police Station heiwa da yachem ki ya u Additional Superintendent of Police, u Pyrkhatlang Suchiang, wa u Officer-in-Charge wow booddien yei takit hajrong iwa da jia.
Ha kani ka sngi da emlang ki dkhot wa kynthup ya u Matthew Beyondstar Kurbah, Adelbert Nongrum wa u Brightstarwell Marbaniang wei da emlang leh ka Deputy Commissioner ka Eastern West Khasi Hills, ka Anita Kharpor, ki sahep pulit wa kiwi kiwi.
Ini iwa da jia da pyntieñ i ya kiwa boon ha ka thaaiñ heiwa da mih i sur wow yada ya ki kynthai wa ki khynnah.
Kiwa hayung ka Darisha da suba ki yei rukom yap ko deiwa kyntait wa da pynkut ko yei mynsien yong ka hi deiwa dawa na ki bor ka aiñ wow pynman yei takit wa tikna wei wow pynchitom ya kiwa emkti.
Discussion about this post