Ynne ka sngi, ki paidbah ka Elaka Nongkhlieh deilang ka seiñ JNC wa JSU da lai paidbah ki cha ka yung krehkaam ka JHADC ha Iawmusiang deiwa sdang na Madan Daimasi, Ladthadlaboh.
Manda poi ha JHADC da khang ya ka Gate heiwa da em i yaklam wa ki heh pulit hapoh i yahkhmat u Addl. SP, u Jason Mairom wa ki Magistrate heiwa ki paidbah da kwah ki wow psiah chapoh.
Hadien kattu katni por neidaw wym wai ya ka Gate, da kyrñioom ya ka Gate hadooh wa kheiñ ko wei da psiah ki chapoh Compound wei da kyrñioom ki leh sa ya ka Gate wow psiah cha ka yung wa em ka kamra krehkaam u CEM ka Council hadooh wa kheiñ wei da pynsangeh noh ya ki da ki heh ki ar seiñ wa ki pulit.
Kawi ka manbei na Elaka Nongkhlieh da ong ko wa kiwa boon kiwa chong chnong ka Elaka toh kiwa im nei rep deiwa kylli wa lada i tih moochuni ktah i yei thaw rep kammon i tih moochuni ym ktah i mo ya ki bru.
Da ong ko leh wa lada kiwa kyrchaan ya ka Shree Cement ong ki wa i wan ka karkhana daw yoh yei roi i paar tangwa mynried daw man ki kiwa sait paikhana donhi deiwa beiñ ya u Dolloi ka Elaka Nongkhlieh wei wow dawa pynhiar chuki ya oo.
Neiliang uwi u manpa da ong u wa nadooh u 2013-14 da rep u ha i thaw wa em deiwa e bor u Dolloi yow rep yow suk ka pateiñ tangwa katni man ko mar dei kangtleiñ. Da khana u wa i daw wa wan cha ka JHADC toh nei bakla na ka Council hi wow e bor ya ka Shree Cement wow yieñ ha itai i thaw chirup wa u Dolloi wa ki kattu katni ki bru.
Sa uwi u khynroo na ka Nongkhlieh da ong u wa u Dolloi da jooh leh u ya ki kaam wa sih heiwa da jooh chah Suspend u la ar sien wei katni leh i jooh hi i man u heiwa ha kani ka kynti da e u ya ki thaw ki paidbah cha ka Shree Cement deiwa dawa wow pynhiar chuki noh ya oo.
Kawi won ka manbei na Elaka Nongkhlieh da ong u wa da pyrchah ya ka Shree Cement toh nachwa ki wa jooh yooh kjat ya ki thaw rep yong ki tangwa katni su kiwa na baar jylla wa uiñ ha ki wei lada dooh ki ya ki thaw rep kattæ da kut hi ka mynried yong ki.
U Reachingson Siangshai hawa e i klam da ong u wa kam u bru samen nadooh wa sdang i wan kani ka karkhana da kyrchaan u ya ki paidbah wow pyrchah ya ka heiwa da thoh nadooh cha ka sorkar jylla hadooh ka sorkar pyrdi, ka Pollution Board heiwa da saitkti ki waroh.
Da ong u wa boon ki bru ka Daistong tip ki wa ka Loom Syrman ymtoh ka chnong katwa katni da man ko ka chnong deiwa kylli neiyi wei ynnu da tip ya ka kam ka chnong.
Chooh chooh da pynkynmoo u wa heipor wa man Dorbar ka JHADC, u CEM da ong u wa i daw wa e bor ya ka Shree Cement toh wa chah pynbor, deiwa kylli yei bor wa laitlooid ka Council.
Da khana u leh yei chah leh embor ki bru heiwa da chah kniehbor ki thaw kiwa da em kot deiwa kdaw ya ka Krem Sutiang kawa man kawi na ki thaw wa rieh u Kiang Nangbah jngai ko du kattu katni Kilometer na u Loom Syrman deiwa ong wa ka Shree Cement u pynwiar ko ya ka parom namo ka History wa kynmoo kamjooh ya i hok ki paidbah.
U President ka JSU, u Jersom Shylla da ong u wa katni da em 8 tylli ki karkhana ha thaaiñ Loomshnong heiwa da ktah ya ki khloo tangwa katni ka sorkar da kwah ko wow pynwiar sa ya ki khloo ha thaaiñ Nongkhlieh deiwa kdaw ya ki krem, ka Narpuh Wildlife Sanctuary wa kiwi deiwa ong wa lada ki 30 MDC ym ye ki wow kreh ya ki paidbah toh su hiar chuki noh ki.
U Sambormi Lyngdoh uwa man u President ka JNC da ong u wa ki baar jylla manda beh ya ki ye ki wow liwan cha Assam cha Bihar tangwa i won cheiwon u lai i hawa chah beh i.
Da ong u wa u Dolloi da chukor u ya ki paidbah heiwa da bynda u pyn ya ki thaw ka Elaka wa ki paidbah heiwa da leh embor u katni deiwa kylli boi ka JHADC da e bor ko ya oo wow leh kamni.
Da khana u wa kani ka Shree Cement da pynemkaam ko da ki Mafia da ki Gang wow beh ya ki bru wei ka JSU wa JNC leh ye ki wow man kamtæ tangwa katni dang kwah ki wow kreh dei maya.
Chooh chooh da kdaw u wa ka MLA ka Sutnga Saipung, ka Santa Mary Shylla da ong ko wa u mooyong ym neh u chirta wei emkaam u kyruiñ cha ki kaam uiñke suwari tangwa kani hi ka sorkar kawa kwah wow pyndooh yeini i miat ki thaw.
Da ong u leh wa lada ymye u pyndooh ya ka Shree Cement wot ki leh ye ki wow Boycott ya ka Election MP ka wow wan.
Heijooh i por da kylli u na u Chief Minister lada em ka aiñ ha ka jylla næ ka ri wow knieh ya ki thaw ki paidbah.
Discussion about this post