Jowai : U Deputy Commissioner ka West Jaiñtia Hills, u Arunkumar Kembhavi ynne ka sngi hadien wa mih ki khubor wa boon i duna hei rukom kreh ka Jowai Polytechnic ha kini ki bnai wada dep, ynne ka sngi syndet syndet da lai u cha kani ka thaw e sikai wow pait wow sylli yei duna wa em ha kani ka Polytechnic.
U DC mar yapoi heini da psiah chwa u ha kamra u Principal wei hadien ini da lai li pait li yoo u yaka yung e sikai heiwa da chem u wa em boon i duna kam ki miej ki chuki wada kheiñ, ki thaw laimihlait kiwa tngit wa sma, ki kamra wa khian wa kiwi kiwi.
Neiliang kiwa pyllai wa u Principal da ong ki wa i daw wa tngit kani ka thaw toh neidaw wa ympu em u yoh ki ya ka um na ka PHE hanlada dep su cha ka tnat hadooh kamwa T. 26 Lak nadooh u snem 2006 tangwa ym em u poi ka um.
Neiliang u DC da kyntu u ya kiwa sikai wa ya u Principal wow chimkhia ki deiwa pyllang poisa para ki yow thied yaka um wa i tiar pynkhooid pynbih ya ki paikhana yow lait na ki kjut wa boon jait khamtam ya ki kynthai. Sñiawphylla u sñiaw wa ki nongsikai chynrang wa ki khynnah puræ pynemkaam ki ya kani ka jooh ka paikhana.
Da e por u leh ya u Principal chibnai yow pynkhooid ya ki painkhana kamjooh leh ya ki soo dong ka Polytechnic wei wow e ki ya ki kot ki sla cha oo yow ye u rah yeini i duna um cha ki bor watoh u pait yeini.
Hapoh ki paikhana ka hostel ki khynnah chynrang da chem wa dang man i iwa jakhlai hi, wei chem chitom ki neidaw wa ym em um haki. Ka Polytechnic em ko ar tylli ki thaw wa taan ya ka um tangwa ym em man ko kawa biang u pynemkaam ki bru neidaw wa joor i ktieh wei soo ware ko. Hanlada kattæ leh u DC e por ya ki khynnah ka hostel 15 sngi yow pynkhooid ya ki dooid wa da sah da blok kiwa da lang um hadooh wa da ujor kiwa sah ha kani ka Hostel wa boon u mait hei miet. U DC da pynchlur u leh ya ki khynnah yow chim khia ki u pynkhooid ya ki soodong kani ka hostel wei daw wan biang u yow bichaar yei kreh yong ki.
Da pyllang u DC leh ya kiwa puræ ha kani ka Polytechnic ha kawi ka kamra deiwa phah yang ya u Principal wa kiwa sikai cha lait. Heini i por kiwa puræ da yoh ki u klam wei da khana lut ki cha u DC yei duna nadooh ki tiar ki tar wa pynemkaam ki hadooh wa em ki nongsikai kiwa chim class dang du le sien donhi ha kani ka semester. Da ong leh ym jooh em yoh laad ki u lai yaki Industrial Visit næ ki Exposure Trip yow yoh ki u yoo yei rukom kreh ki company wa kiwi kiwi.
Da chem khamtam ha ka Costume Design and Garment Technology wa duna tiar soor wa ki tiar pynriam sula tangwa da pynoo ki khynnah ha iwi i kamra wa chlai du ki kor soor wa booh khlem pynemkaam. Neiliang u Principal da ong wa em du kattu katni kiwa ym em krehkaam wei em kiwa ym yoh bru yow repair yaki. Hadien da pyntip ki Head of Depratment wa ka Company USHA smat ko u yarap ya ka Polytechnic tangwa neiliang yong ka ym jooh em thoh ko cha ki. Ya kini ki tiar da ieh kamni la jan chiphaw snem.
Neiliang u DC da ong u ya ki khynnah u e da ka chithi cha oo yow sdang u pynbait iwi pa iwi wa duna kani ka Polytechnic.
Discussion about this post