Ka lympung yalehbol wa tip kam ka 6-A-Side Knockout Football Tournament 2026 wa pynlai da ka Lion Sports & Youth Affairs ha Madan Biar Skur Mission Compound, Jowai dapoi noh ko chawa kut ynne ka sngi heiwa u Montri ka chnat Sports and Youth Affairs ka sorkar jylla, u Wailadmiki Shylla uwa man leh u MLA ka thaaiñ, da wan u wow pynhaap pyrda hei emlang u MLA ka Khliehriat, u Kyrmen Shylla wa kiwi de.
Kani ka lympung yalehke toh kawa da sdang nadooh ka 9 tarik u bnai May wei em ko ar bynta wa kynthup ya ka Veterans waka Open to All.
Ha ka Open to All da chimbynta 32 tylli ki Team katwa kiwa poi cha ka yakhun Final toh ka Iong-i pyrchah ya ka Death FC.
Ha ka Veterans won na ki 10 tylli ki Team wa chimbynta, kiwa poi Final toh hapyrdi ka Legends FC pyrchah ya ka Sniper.
Ha ka yakhun Final yong ki Veterans won da chimbynta deilang u Wailadmiki Shylla na ka Team Sniper wa u Kyrmen Shylla na ka Team Legends heiwa yei naam jop da rah da ka Legends FC.
Ha ka Open to All won yei naam jop da yoh ka Iong-i.
Kawa jop ha ka Veterans da yoh ko ya ka song poisa wa Rs. 20,000 katwa kawa rem won Rs. 10,000
Kawa jop won ha ka Open to All da yoh ko ka song poisa wa Rs. 40,000 katwa kawa rem won Rs. 20,000.
Yei naam Man of the Match yong ka Veterans da yoh u Teibor Swer katwa ha ka Open to All won da yoh u Nikhelroy Shadap.
Yei naam Top Scorer yong ka Veterans da yoh u Kyrmen Shylla uwa da yoh u thap hadooh 10 kool.
Chwa u sdang ka yalehke, u Wailadmiki Shylla hawa klam kam u kongsan da yaroh u ya ka Lion Sports and Youth Affairs hajrong i kynmoo kyrpang ko leh ya ki bru waheh kiwa chisien ka sngi da man kiwa bna naam hei yalehbol.
Ong u leh wa i yalehke Sports najrong wa man kawa e yei chait i khiah, man ko leh kawi na ki laad kamai ha kini ki sngi wei wai ko leh ki laad yoh khih sorkar lada ye u rah naam ya ka jylla.
Neitæ da pynkynmoo haroh u ya ki kaam wa ka sorkar jylla leh ko heiyatoh u pynku yei yalehke Sports ha ki District waphær ka jylla nadooh i pynbiang ki madan yalehke wa kiwi.
Discussion about this post