Hadien wa ka sorkar da pynkrehkaam ko ya ka ‘Containment Measures’ ha Shillong, Jowai wa Tura, da sakhi won yei ku kiwa chah ktah ha u COVID-19 wei ynne ka sngi da em 246 ngut kiwa dang yoh thymme ya uni u khñiang ha ka jylla, wei ha Meghalaya katni em 1884 ngut kiwa dang chah ktah wei da em 6 ngut kiwa khlaad ha ki 24 kynta na kiwa chah ktah.
Heiyatoh wa ini, ka sorkar ynne ka sngi da rai wa waroh ki dukan ha Shillong toh u khang ki hapoh 7:00 i miet nadooh mynstep ka 4 tarik.
U krehkaam ka Curfew nadooh 8:00 i miet hadooh 5:00 waje i step ha Shillong Agglomeration nadooh mynstep wei da pynduna ya ki kynta wow man kreh na ka 5:00 i janmiet cha ka 4:30 i janmiet ha Shillong Agglomeration.
U Symbood Montri Rangbah ka jylla, u Prestone Tynsong da ong u wa ka sorkar da rai ko wa nadooh katni u pyndep noh ya ka lehniam wa khaddooh ya kiwa khlaad (tlep næ thang) toh u pyndep hapoh 2:00 waje i sngi ha waroh kawi ka jylla.
Da ong u wa kani ka rai toh neibynta kiwa khlaad waroh hapoh ka jylla lada neidaw u COVID wa kiwa ymtoh na u COVID-19.
Heijooh i por da kyntu u ya waroh ki niam, ki balang wa ki bor chnong wow krehlang ki wa ka sorkar.
Da ong u leh wa ya katni hi ympu yoo wa emkaam wow khang sbak næ wow pynkrehkaam ya ka Lockdown tangwa ka sorkar dang pait ko yei man i long ka khlam wei rukom poor ko ha ka jylla.
U Prestone da kyntu u leh ya ki paidbah wow bood ya ki kyndon sorkar deiwa maham leh ya kiwa tyngkheiñ ya ki.
