Jowai : Ki paidbah da ood weida khñium ki wada sih ware u sarok na Pasyih-Mynso-Mookynshnian yowa tip pyrtuid leh kam u Mynso-Shilliang Myntang Road wa u sarok Jowai-Nartiang-Khanduli (JNK) Road neidaw wa tih moo tih chyiap ki bru ha rood u.
Hadien ini ka office u DC WJH da e hukum u katkam ka kyndon aiñ Section 133 Cr.PC pyrchah yaki tre thaw watih moo kiwa kynthup ya u ma Rolin Dhar, u ma Sanjoy Syntem, u ma Khio Pan, u ma Ioon Pale, u ma Riki Syntem, u ma Ren Pan, u ma Mom Pan, u ma Sanit Chen, u ma Loi Chen, u ma Rinmon Langdoh, u ma Metar Syntem, u ma Lang Pale, ka kong Pli Syntem, u ma Orlan Lamare, u ma Nal Lamare wie waroh kini man ki kiwa kiwa chong wa sah ha chnong Mynso, West Jaiñtia Hills.
Kamjooh leh pyrchah ya ka kong Nine Symblai, ka kong Moo Maskut, ka kong Ngong Maskut, u ma Loit Maskut, ka kong Liew Shitrai, ka kong Nah Phalangki, ka kong Timai Phalangki waroh kiwa chong wasah ha Nartiang, West Jaiñtia Hills, Chirup wa u ma Wotshing Sana na Mupliang.
Uni u sarok Pasyih-Mynso-Mookynshnian ( wa tip leh u Mynso-Shilliang Myntang) da sih bah u hei bynta 17 km hadooh 20 km, u Jowai-Nartiang-Khanduli (JNK) hei bynta 17 hadooh 18 Km da sih ki hadooh kattæ wa da booh ki ya ki paidbah wa lai wa wan ha i ma wa khroo khamtam kiwa lai wa wan neini.
Neiliang u Executive Engineer da pyntip u wa i tih moo ha kini ki snem wada dep harood kini ki sarok da pynsih bha i ya kini ki sarok hadooh wa em ki bynta da rben i ktieh hadooh 1.5 metre.
Natloor wada kyrpad wow sangeh kini ki bru i tih moo daman i iwa sepai waroh neibhah wa pteiñ bait ki u leh yeini i kaam.
Neiliang ki bor District da bichaar ki yeini katkam ka kyndon aiñ Section 133 Cr.PC chirup waka Section 143 Cr.PC pyrchah yakini ki tre thaw tre moo.
Kamtæ heiyatoh weini da hukum kamni :
(I) Wow sangeh ki u tih moo nadooh wa mih kani ka hukum.
(II) Wow kyrriah weiwow pynkhooid ki ya waroh i ktieh wei khyndaw na u sarok, ki dooid, ki hume pipe wada dap khyndaw khang wow man u u sarok wow hoi u lai u wan ki kari.
Neiliang u Executive Engineer won daw duk u wow e yaka Fitness Certificate hadien wada dep leh kini ki bru ya kini ki hukum wei haap leh ki yeini hapoh chibnai nadooh wa mih kani ka hukum wei lada kyntait ki u leh yeini haap laimih ki cha u DC ka West Jaiñtia Hills hapoh chibnai heiwow jubab ki yeidaw wym booh wym leh ki ya kani ka hukum.
Lada kattæ leh lada ym ye ki u leh yeini ye ki u chah pynchitom katkam ka kyndon aiñ Section 188 IPC.
Ya kani ka hukum u man i hapoh i pait i yoo u Executive Engineer PWD (Roads) wei i lut i sep waroh toh na kini ki bru kiwa man ki tre thaw tre moo, wei kat iwa yoobiang u yow pynkreh ya kani ka hukum.
Ya kani ka hukum da pynmih haka 1 Naiynru (June) 2016.
Discussion about this post