Ynne ka sngi u montri rangbah ka jylla, u Conrad K. Sangma da lai pait lai booddien u ya ki kaam pynroi waphær waphær ha thaaiñ Tura heiwa nyngkong da lai pait u ya i kreh ha ka P.A. Sangma Stadium, Tura kawa daw ye u pdiang hadooh 10,000 ngut ki bru wei ka wow em ya ki Gym, Swimming Pool, Lounge, Cafeteria wa kiwi kiwi.
Neiliang u Conrad da sñiawkmen u wow sakhi ya i kreh iwa da lai bait heiwa da booh thong wow pyndep ya i kreh ha u Kmaichonglad uni u snem heiwa i kreh da lut i kamwa T. 125 klur na ka chnat Ministry of Minority Affairs ka sorkar India.
Ha kani ka sngi da lai wai u leh ya ka Hatchery Unit ka Jakkindil Organisation Committee ha chnong Dachimagre kawa man ka committee yong ki Self Help Groups ka wow yarap e kreh ya kiwi tawon ki kynthai wa ki manbei. Da pyntip u wa hapoh ka NRLM wa kiwi ki programme da jied ya ki 30,000 tylli ki SHG ki wow yoh yarap hadooh T. 200 klur.
U Conrad da lai pait u leh ya i kreh ha ka Tribal Research Institute ha Chidekgre kawa em hajan Babadam ya kawa da e poisa wow chna da ka Ministry of Tribal Affairs ka sorkar India kamwa T. 41 klur wei ini man i katkam i angnood u pa u yong oo uwa man leh u MP ka Lok Sabha Speaker, u (T) P. A. Sangma uwa kwah wow pynneh yei man kyrpang ki jaitbru ka thaaiñ mihsngi ka ri.
Chooh chooh da lai pait u leh ya ka Prime Hub Rongram Block heiwa da yaklam wa ki seiñ kiwa rep sy’iñ, slacha, Coffee, sachram wa kiwi kiwi wei ya kani ka yalang da pynman da ka Bakdil NGO kawa pait ya i kreh ka Prime Hub ha chnong Jongdikgre.
Ya kani ka sngi da pynkut u montri rangbah deiwa lai pait ya ka Babadam PHC heiwa da klam u ya kiwa kreh deiwa yaroh leh ya i chakri yong ki iwa khlem sangeh ha i chait i khiah neibynta ki paidbah ka thaaiñ deiwa ban wa ka Babadam PHC da man ko kam ka sabut yong i kylla neibhah wa nachwa duna bha kiwa kreh, i thut i rukom saam bordiñ, i thut wow yoh ya ka um, wa kiwi kiwi wei da kdup ko ya ki 47 tylli ki chnong wow e chakri.
Kani ka PHC toh i dak yong i myntoi wa yoh na i rukom krehkaam PPP heiwa da pynlai ya kani ka thaw sumaar da ka seiñ BAKDIL heiwa da sakhi wa duna bha kiwa yoh kjut Malaria, da ku i kha-khon ha ki thaw sumaar, i e dawai tika ya ki khynnah wa kiwi kiwi.
Ynne i step u montri rangbah da yaklam u leh wa ki dkhot ka VEC, Nokma, wa kiwi kiwi ha Rangwalkamgre ICDS Centre.
