Hun O wow chah kem neibynta ka ILP: HS Shylla

Shillong: U Chief Executive Member (CEM) ka Khasi Hills Autonomous District Council (KHADC), u Hispreaching Son Shylla da maham u ya ka sorkar jylla wa yahkhmat da ka NPP lada ym soi næ e ya ka muhor ya ki ar tylli ki Bill wa da monjur da ka dorbar KHADC, kitæ ka KHAD (Khasi Social Custom of Lineage) (Second Amendment) Bill, 2018, wa ka Inner Line Permit.

“Kani ka sorkar yong u Conrad toh wow soi ko ya kane ka Bill wa khang ya ka chongkha khleh, kamjooh leh ya ka ILP, lada kani ka sorkar u Conrad Sangma ym soi ko daw mih paidbah hadooh wow mih ka umsnam leh,” ong u Shylla hawa yaklam ha ka yalang ha Ïewduh deiwa paan leh ya ka monjur na ki paidbah.

Chooh chooh u CEM ka KHADC da ong u wa da e bor ya ka District Council wow pynkrehkaam ya ka ILP wow khang laad ya ki baar ri wow psiah ki cha kani ka jylla khlem em ka Permit.

“I bor da e ha ka District Council wow pynkrehkaam ya ka ILP, nga ym tieñ lada wow chah kem O leh neibynta ka jaitbru yong i, i da em chwa i ha ka ma kawa khroo hadooh kattæ kattæ. Ki thaw ri-thor ka Garo Hills da lai ki, katwa katni won saka jaitbru yong i,” ong u Shylla.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Shylla da ong u wa 75 na ka 100 Percent ki kynthai Khasi wa kamai ha yaaw toh kiwa yoh kurim dkhar Muslim, hanlada ya ki dkhar ym joo chah wow khayi ha Ïewduh khlem da yoh ya ka License khayi na ka KHADC, tangwa manda lai khynra ka Council da mih da ka kynthai Khasi kawa kaam toh u kurim yong ka.

“Nga klam O ya phi ki warep toh u kyrchaan ya kini ki ar tylli ki Bill, neini cha khmat wei wow kiar nei chongkha khleh neibha da wan ngooid chwa ya ka jaitbru yong i,” ong u CEM ya ki warep ha Ïewduh.

Hawa yaklam wa u Banteidor Lyngdoh hajrong kani ka Bill da ong wa kam u MDC da monjur wei da sniaw yahap u ya kani ka Bill wei da ong u leh wa ka sorkar ym pu em yaklam ki hajrong kani wei dang ya yalap kamtu kamni para MLA ym toh ha ka sorkar.

“Kam u MDC nga kyrchaan O ya kani ka Bill neibhah man ko neibynta ka jaitbru wei ym em man ko du neibynta yong nga samen kamjooh ya u Conrad wow chim ya ka rai, emkaam wow ya chonglang yow pyrkhat yillu wa ki lok wa em ha ka sorkar,” ong u Montri sorkar.