October 26, 2017
0 Comments
Jowai: Katkam ka khubor wa da phah da u Waheh Chnong ka Dorbar Chnong Pasyih u Justine Phawa ryngkat wa ka VDP chnong, da ong wa ym emkaam u yohbor ki na u Waheh Chnong ka Ialong u Bishar Shylla wow booh ya ka Signboard ha 7-mer Pasyih, West Jaiñtia Hills District, neibhah wa kani ka Signboard em ko hapoh u pood u ang ka chnong.
Da ong ki wa katkam wa i pynbaad u Bishar Shylla man i iwa khlem yurim wei ym wym ye u pdiang da ka chnong Pasyih. Ka chnong Pasyih kwah ko wow pyntikna wa ki VDP ka dong Neinshnong Pasyih da booh ki ya ka Signboard hapoh u pood u ang ka chnong Pasyih wei toh wow yaleh pyrchah ya ki kaam sih hapoh ka chnong.
Da pynsñiaw ki leh yei mynsien wa phylla wa kammon u Waheh Chnong ka Ialong yada u ya ki wa pynjæd wei tooh ya kani ka signboard kiwa kynthup ya u Lu Phawa, u Phin Phawa wa u To War kiwa na Ialong, kiwa da wan chim ya ka Singboard yong ka VDP Neinshnong Pasyih ha ka 01.10.2017 heipor 9:40 PM hajan Petrol Pump Hapsingmani ha Ladsliya 7-mer Pasyih.
Hei yatoh wa i pynbaad u Waheh Chnong ka Ialong wa ya ka signboard VDP ka dong Neinshnong Pasyih da pynyieñ yabor ko hapoh u pood u ang ka Ialong, kamtæ ini pynyoo i wym tip u Waheh Chnong ka Ialong ya u pood u ang ka chnong yong oo.
“Kamtæ neiliang ka chnong Pasyih kyrpaad i ya ki bor ka aiñ wow chimkhia ya ini waroh” da ong u Waheh Chnong ka Pasyih u Justin Phawa.