theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

I chah ktah ka hali toh wa tih mooyong hi ka tre hali

Advertisement ad1

Hadien waka Redial Dkhar naka chnong Moolang, East Jaiñtia Hills da pynbaad ko wa ka hali yong ka da chah ktah ko nei booh mooyong ka Riyo Siangshai hei thaw yong ka, kamtæ ynne ka sngi ka Riyo Siangshai da pynche ko wa ka hi wym em de kreh mooyong ko nadooh wa khang ka sorkar næ leh pyrchah ko ya ki aiñ chnong, wei utæ u mooyong wa em hei thaw yong ka leh ymtip tre u yong oo, wei uwa da neh da slem por.

“I chah ktah ka hali ka Redial Dkhar toh neidaw wa pna tih moyoong hi ko ha hali yong ka, wei arsngi chwa wow pynlait khubor pynbaad ko ya nga da kit pynlut ko waroh u mooyong wa booh ko harood hali yong ka, wei da khalah haroh ko yaka yingkieñ wa jooh pynemkaam ko wow hiar chapoh i krem mooyong yong ka khnang wa ki bor ka aiñ wym chem dien ki ka,” da ong ka Riyo Siangshai.

Da khana haroh ko wa hachwa wa ka Redial Dkhar u pynbaad ko ya ka lyngba ki laad pathai khubor, man-i-por jooh wan maham wei dawa poisa ko na ka Riyo Siangshai daki phaw phaw lak tangka deiwa yah deilang ki bru yong ka.

Da ong ko wa ka sien nyngkong dooh wa wan maham wei dawa poisa toh u Jopsing Latam wa sah ha Ladrymbai wa u Lan Siangshai u kurim ka Redial Dkhar, neitæ khaddooh i wan yong ki toh hei miet ka 08-06-2022 deiwa maham wa lym yoh ki yaka poisa i mynsien yong ki u em i hei maa.

“Hadien wa ki khon yong nga sñiaw chrai ki yei wan maham wan dawa poisa ka Redial Dkhar iwa man-i-por, kamtæ ha ka 25-07-2022 dang step da lai chondur ki khon O yow yoh yoh sabut katwa dang thap mooyong ko hapoh truck uwa da tih ko pyn hajan ka hali yong wei yow pynsakhiat wa ka Redial hi wa tih mooyong, tangwa heitæ i por ka Redial wa ki bru ko wa emlang heitæ da knieh ki ya ka Mobile Phone u khon yong nga wei da pyndam (Delete) ki ya ki dur wa da yoh u wow chon.”

“Hei step wa bood won ka 26-07-2022 sa uwi u khon yong nga da lai biang u ha katai ka thaw wa thap mooyong ko yow chondur, kamtæ da wan toor u One Dkhar, ka Redial Dkhar, u Firstboy Dkhar u khon ko, u Lan Siangshai u kurim ko deilang i rah wait da maham da dat wei knieh ki ya ka mobile yong u knon O wei da chah dat u leh ha u Lan,” da pynrap ka Riyo Siangshai.

Hajrong ini i jia waroh da ong wa ka Redial Dkhar won da lai ujor FIR kylla ko deiwa pynbaad wa hei miet ka 25-07-2022 u khon ka Riyo Siangshai da maham u ka wei hei step ka 26-07-2022 da lai dat lai maham ki ka katwa dang sait-that ko hajan hali ko, tangwa i sakhiat hi lai chondur u ka katwa dang thap mooyong ko hapoh truck.

Neidaw wa arngut ki khon ka Riyo Siangshai deilang u kurim yong ka da chah rah ki haki pulit hajrong i ujor FIR ka Redial Dkhar, kamtæ ka Riyo Siangshai da kyntu ko yaki bor sorkar wow leh yeiwa emkaam wei wow hiar sakhi ya ki dak ki chin khnang yow chem ki yei sakhiat wa ka Redial Dkhar hi wa kreh mooyong ha hali yong ka hadooh kini ki sngi, ymtoh kamwa pynbaad ko.

Kam wow pynkynmoo neiliang ka Riyo Siangshai leh da dep booh ujor ko pyrchah yeini i leh ka Redial Dkhar ha Ladrymbai Police Station ha ka 26-07-22.

Ka Riyo Siangshai
I lyngka ka Redial
I lyngkha ka Redial
I thaw tih mooyong
I thaw tih mooyong
Heipor wa kit mooyong
Heipor wa kit mooyong
Hadien wa da dep kit yow mooyong
U khon ka Riyo wa chah dat
Share this:
Previous

Kyrchaan pura ka FKJGP yei khang ka KSU ya ka Toll Plaza ha Lumshnong

Next

Kammon ha Parliament da ong wym em i pynmih mooyong ha Meghalaya la 4 snem, dawa pynche u George