U Chief Minister ka Assam, u Himanta Biswa Sarma ynne da ong u wa i khloh loom ha khappood Assam-Meghalaya khamtam ha thaaiñ Jorabat wa ka University of Science and Technology Meghalaya (USTM) da pynjoor i yei chlai um ha Guwahati.
U Himanta da ong u wa ka Supreme Court da thung ko ya ka Committee kawa da e ya ka Report hajrong i chah ktah ka mariang ha thaaiñ khappood.
Da kdaw u wa ka USTM toh kawi na ki thaw wa wanrah yei sñiawkhia nei khloh ya u loom iwa da ktah ya ka mariang ha talawiar ka 10 km kani ka skurbah.
U Himanta da ong u leh wa i khloh khyndaw da wanrah i yei kai ka um palat yeiwa ki dooid ki liar ka Guwahati ye ki wow pdiang.
Da ong u wa daw kyntu u ya ka sorkar Meghalaya wow pait yei tei ha Jorabat wei kammon u khoom u kdoh ya ki lym kamtæ ka Guwahati daw chem chitom bha ko hadien.
Heijooh i por da kubur u yei emkaam ka Meghalaya ya ki kaam pynroi, heiwa u Himanta da ong u wa i daw wa man ko ka jylla wa em loom kamtæ emkaam u khloh ya ki wei wow pynmadan ya ki.
U Himanta da kyntu u leh ya ka sorkar Meghalaya wow pyrkhat leh ya ka Assam kawa chem chitom nei tei wa har rukom ha Jorabat khnang wow lait ka Guwahati u chem chitom.
Da ong u leh wa katkam wa man katni ini i kaam dang sah i ha Supreme Court wei ka sorkar Assam daw ap ko leh yei chem ka Committee wa thung ka Supreme Court.
U Himanta da maham u leh wa i kai ka um na ki loom ka Meghalaya booh i hei maa ya ka Lokpriya Gopinath Bordoloi International Airport lada pteiñ i khloh loom khlem pyrkhat.
Discussion about this post