U Montri ka sorkar jylla uwa man leh uwa e ktien ka sorkar, u Paul Lyngdoh da ong u wa i wan toor kiwa wan mylla wa wan kreh chapoh ka jylla toh neidaw wa ki tre chnong ym ye ki wow pyndap ya iwa emkaam ha ki kreh mylla.
Heijooh i por da pdiang u yeiwa ong u Montri Rangbah, u Conrad K Sangma wym em ka Work Permit wei da ong u wa ha kani ka aiñ da pynemkaam yei kyntien Registration tangwa i krehkaam ka kyntien Registration ym phær ko na ka Work Permit hi.
Da ong u wa kiwa wan mylla kiwa na baar ymtoh u sah ki palat ya ka 179 sngi wei man ka 179 sngi toh u pynthymme ki yei booh pyrtuid wei lym leh yeini daw hap ki wow mih napoh ka jylla.
Hawa klam ynne ka sngi, u Paul da ong u wa ka sorkar jylla da pynkylla ko ya kani ka aiñ Inter-State Migrant Workmen (Regulation of Employment and Conditions of Service) Act, 1979 ha u snem 2011 ha i por wa oo dang man u kam u Montri ka chnat Labour ha utai u snem.
Da ong u wa ki seiñbhalang da khut ki ya kani ka aiñ kam ka Work Permit wei ym em yaphær na ka ktien Registration neibhah kiwa mylla ym ye ki wow sah palat ya ki sngi wa da booh hawa wan kreh ki lym kamtæ hap ki wow pynthymme.
Da ong u wa ye u em i duna kam i duna kiwa kreh ha ka chnat Labour tangwa ya kam ini i eh ye wow pynbait.
Da ong u leh wa i wan psiah ki bru cha ka ka jylla em ko ar bynta, kawi toh kiwa wan kam kiwa uiñke suwari kiwa e myntoi ya ki paidbah wa kiwi kiwa wan kam kiwa kreh mylla wei ym em iyi iyi leh iwa kulmar namo i wym sñiawthooh ya kini ki ar jait.
Discussion about this post