U Montri ka chnat puræ puthi ka jylla, u Lahkmen Rymbui hajrong i dooh thaw puræ ki khynnah ha ka Class XI khamtam ha uni u snem wa da em palat 100 ngut iwa da pynbor ya ka sorkar wow sdang noh ya ka Morning Shift ha Government Boys HSS, Jowai da ong u wa ki khynnah kiwa da pyndep SSLC ha uni u snem napoh Ri-loom Jaiñtia (East wa West Jaiñtia) da chem wa ki Seat em ki palat bar ya ki khynnah wa Pass wei lada jia waroh lai ki ha ki thaw puræ kiwa em hapoh ka District kattæ leh dang boon ki seat neibhah wa boon ki skur kiwa em ha palat sor kiwa da sdang ya ka HSSLC.
Da ong u wa i rukom pyrkhat wow lai puræ bait ha Jowai da toh u kylla noh i.
Heiyatoh wa ki Graduation da ong u wa ka sorkar da chimkhia ko wow pynryngkat kyrdan ya ki College kiwa em ha sor wa palatsor hapoh Ri-loom Jaiñtia heiwa ki le tylli ki College da tipmit noh ya ki kam ki People’s College, kitæ ka Jaiñtia Eastern College, ka Nongtalang College wa ka Shangpung College wei ini mut i wow pynjan ya ki khynnah na ki chnong kiwa em hajan kini ki College.
U Lahkmen da ong u wa ka Result HSSLC na kini ki College man ki kiwa miat wei katni boon ki Seat ha kini ki College tangwa waroh kwah ki wow lai ha Kiang Nangbah Government College, Jowai.
Da e nongmuna u leh wa ka Nongtalang College kattu la san snem dadep yoh tipmit (Accredited) kamjooh leh ka Jaiñtia Eastern College leh da man Accredited wei ka Result leh na ki College cha palat sor dang miat bha ki bar ya kiwa em ha sor.
Heijooh i por da ong u wa ha Kiang Nangbah Government College ha kawi ka Class da chong 70-90 ngut ki khynnah wei ki khynnah wa rap duna chem chitom ki katwa cha palatsor won ki Class kiwa chim du kamwa 30 ngut daw suk bha ya ki khynnah u ap ki yeiwa sikai kamtæ da wanrah ya ka People’s College Scheme ha waroh ka jylla wow yaryngkat kyrdan ki College wa kiwa em ha sor.
