theme-sticky-logo-alt
theme-logo-alt
Advertisement ad1
Advertisement ad1

Kyrmen u Lahkmen wa daw chah jied ka KNGC wow sdang ya ka Four Year Integrated B.Ed Course

“Ka B.Ed College toh kawi na ki kaam wa sahteiñ kawa nga neipor cheipor pyrchang O wow pynman kaam neibynta i myntoi ki paidbah,” da ong u Montri ka chnat puræ puthi ka jylla, u Lahkmen Rymbui hawa yaklam hadien ka yalang lehkmen yei yoh B Grade ka Kiang Nangbah Government College ynnin ka sngi. 

Da ong u wa nyngkong heipor wa yaleh wow wanrah ya kani ka thaw esikai, ka National Council for Teacher Education (NCTE) heitæ i por chwa wow wan ki sahep na ka da pynkylla noh ya ka aiñ heiwa ki B.Ed College ymye de ki wow e ya ka Course kawa ar snem tangwa da ka Four Year Integrated B.Ed Course kawa soo snem ya kawa ka sorkar jylla da yaleh ko wow pynbiang ya ki kot ki sla tang da ong won ki wow yang ya ka Policy wa thymme.

U Lahkmen da pyntip u leh wa ha u Kmaichonglad (December) 2020 da jied ya ka Kiang Nangbah Government College wow man kawi na ki thaw ha ka ri wow esikai ya ka Four Year Integrated B.Ed Course heiwa da booh wa ha u Thohlakhmi (February) uni u snem wow wan sylli (Inspect) cheini tangwa syndet da pynkylla biang ya i rukom krehkaam (Policy) wei da pyndam yeitæ. 

Heijooh i por da ong u wa ha u Naichiphaw (October) uni u snem ka sorkar India da pynbna ko wa ha u 2022 daw jied ya 50 tylli ki College wow man kam ki Model neibynta wow esikai ya ka Four Year Integrated BEd Course hapoh ka ri waroh kawi wei mar yoo yeini da yachem u wa ki sahep ka chnat puræ puthi ka sorkar India kamjooh u Montri yong ka heiwa da thoh cha ka sorkar India wow sdang ya kani ka Course neibhah wa nadooh u 2019 da dep thung ya ki bru ha kani ka College heiwa da yoh leh i kular na ki hajrong ini manda sdang ki yeitæ. 

Da kyrmen skem u leh wa ha u snem wow wan namo ha iwon iwon i por wa ka sorkar India sdang ko ya kani ka Course, ka Kiang Nangbah Government College u man ko kawi na ki thaw wow esikai ya kani ka Course hapoh ka ri.  

Share this:
Previous

Vijay Hazare Trophy: Jop ka Meghalaya ya ka Sikkim

Next

I dooh thaw puræ toh wa yaknieh wow lai du ha iwi i thaw: Lahkmen Rymbui