Jowai : Ka seiñ All Jowai Chickens Supplier and Retailer Association Jowai (AJCSRA) næ ka seiñ ki nongdai syiar hapoh chnong Jowai lyngba ka khubor na u Secretary ka Seiñ u ma Ioanis Lyngdoh da pyntip u wa ka seiñ man ko kawa u kreh neibynta i bha i miat i rukom chakri cha ki paidbah.
Heijooh i por u ma Ioanis da pyntip u wa ka seiñ da chong pyrkhat bha ko haka 15 tarik uni u bnai hei yatoh wei rukom dai doh syiar ha yaw ha hat wa ha ki kyntoit waroh. Tæ hei yatoh wa ini ka seiñ chisur da rai ko wow booh ryntih yei dor i doh syiar.
Da pyntip wa i dor yong i doh syiar broiler wada dep pynkhooid (Dress chicken Broiler) u man T. 220/- chi kilo, kawa dang im (Live Chciken Broiler) u man T. 150/- chi kilo. Ka Syiar Kuroiler wa dang im (Live Chicken Kuroiler) u man ko T. 250/- chi kilo.
Ka Seiñ da pynbait ko wa ini i dor u krehkaam pura i nadooh ka 23 Kmaichonglad 2015 hadooh wa da pynbna deiwi won. Kamjooh leh ka Seiñ de kyrpad ko ya waroh ki nongdai wa ki nongthied syiar wow yakrehlang khnang wow man ko ka kaam kawa lai bait yow myntoi ki paidbah waroh.
Discussion about this post