Ki pulit ka West Jaiñtia Hills hadien wa da tip tikna wa daw em kiwa na Manipur kiwa da thmu wow wanrah ki mar pyrchah aiñ chapoh ka jylla, da pynman yei thooh ya kini ki bru hei yahkhmat u Jason Mairom, Additional SP, ki pulit ka District deilang ka Anti-Narcotics Task Force (ANTF), Jowai nadooh i miet ka 27 tarik uni u bnai heiwa hei step ka 28 tarik da yoh wow ksoh ya ka kari TATA kawa em Number ML-05K-2315 hajan Phramer Traffic Cell kawa wan neiliang Khliehriat deiwa em ar ngut hapoh kari kiwa da kem noh ki pulit.
Kini ki ar ngut toh u Chuchung Serto uwa chong chnong ka Nakhunjang, Kangpokpi, Manipur wa u Thanggin Towthang uwa chong chnong ka Songpehh, Churachandpur, Manipur.
Hawa kynreh ya kani ka kari da chem ya 50 tylli ki khieh sabon wa em 512.63 grams i Heroin kiwa da murieh bha ha i bynta ka kari wa em ha tre ka dwar iwa da chna kyrpang yow murieh yeini i drugs.
Ini i Heroin wa yoh kem toh iwa chongdor Rs. 2.5 klur.
Da yoh leh wow kem ya ka poisa India wa chongor Rs. 6,775, ka poisa South Korea 3000 (da ki kot 1000 kawi), ka poisa ka ri Kazakhstan da ka kot 500, ka poisa Myanmar da ka kot 10 wa ar tylli ki Mobile Phone.
Ya kini da pynngat hapoh ka aiñ NDPS wei ka takit dang lai ko yow chem ya kiwi de kiwa emkti ha ini i kaam.
Ki pulit da ong ki wa u yaleh ki katwa ye wow yada ya ka imlang sahlang na kam kini ki kaam deiwa kyntu leh ya kiwa chong chnong wow pyntip lada yoo ki wa em iwon iwon iwa yoo suba ki.
Discussion about this post